नांदेड : जिल्हा पोलिस दलाकडून विविध पोलीस ठाण्यातंर्गत विविध गुन्ह्यातील आरोपीकडून हस्तगत करण्यात आलेले सोन्याचे, चांदीचे दागिने, रोख रक्कम, मोबाईल, विविध प्रकारची वाहने व इतर वस्तू असा एकूण तीन कोटी २३ लाख रुपये किंमतीचा मुद्देमाल फिर्यादी यांना (ता.२६) कार्यक्रमात परत करण्यात आला आहे.

यावेळी नांदेड परिक्षेत्राचे विशेष पोलीस महानिरीक्षक डॉ. शशीकांत महावरकर, जिल्हाधिकारी अभिजित राऊत, पोलीस अधिक्षक श्रीकृष्ण कोकाटे, अतिरिक्त पोलोस अधीक्षक अबिनाश कुमार, डॉ. खंडेराव धरणे, पोलीस उपअधिक्षक (गृह) डॉ. अश्विनी जगताप, श्रीमती स्नेहल कोकाटे आदींच्या हस्ते फिर्यादी यांना किंमती मुद्देमाल परत करण्यात आला. मुद्देमाल हस्तांतर करण्यासाठी वरिष्ठ अधिकाऱ्यांच्या मार्गदर्शनाखाली पोलीस उपअधीक्षक डॉ. अश्विनी जगताप, जगदीश भंडरवार, श्री तुगावे, श्री. आरेसवार, श्री. मिटके, गंगाप्रसाद दळवी, त्र्यंबक भोस्कर, श्री. कदम, श्री. पचार, श्री. कागणे, श्री. बेरळीकर, टोम्मे, श्रीमंगले, पोलीस कर्मचारी राठोड व वंजारे आदींनी परिश्रम घेऊन कार्यक्रम यशस्वी केला.

कायदेशीर बाबींची केली पुर्तता

जिल्ह्यातील विविध पोलीस ठाणे अंतर्गत विविध गुन्ह्यातील आरोपीकडून हस्तगत करण्यात आलेल्या किंमती मुद्देमालामध्ये सोन्याचे, चांदीचे दागिने व रोख रक्कम असा एकूण ९८ लाख ५८ हजार ११२ रुपये. इतर मुद्देमाल ज्यामध्ये दुचाकी, चारचाकी तसेच इतर मोठी वाहने असा एकूण दोन कोटी २५ लाख १९ हजार सातशे रुपये तसेच सायबर सेल विभागाकडून हरवलेले, गहाळ किंवा चोरलेले असे २१ लाख ३१ हजार ९५ रुपयांचे एकूण १२८ मोबाईल असा एकूण तीन कोटी २३ लाख ७७ हजार ८१२ रुपयांचा मुद्देमाल हस्तगत करुन कायदेशीर बाबींची पूर्तता करुन फिर्यांदी यांना परत केला आहे.