कोल्हापूर : नवरात्रोत्सव जवळ (Navratri Festival) आल्याने करवीर निवासिनी श्री अंबाबाई मंदिरातील (Ambabai Temple) विकासकामांना गती आली आहे. नवरात्रोत्सवात होणाऱ्या भाविकांच्या गर्दीच्या पार्श्‍वभूमीवर दर्शन रांग वाढविण्यात आली आहे. त्यासाठीचे काही बॅरेकेडिंग लावण्यात आले असले तरी अद्यापही काही बाकी आहेत.

पुढील दोन - चार दिवसांत बॅरेकेडिंगचे काम पूर्ण झाल्यानंतर मंदिरातील नवरात्रोत्सवाच्या तयारीला सुरूवात होणार आहे. दरवर्षी नवरात्रोत्सवात भाविक विक्रमी गर्दी करतात. त्या पार्श्‍वभूमीवर पश्चिम महाराष्ट्र देवस्थान समिती भाविकांना विविध सोयी - सुविधा देण्यासाठी महिनाभर आधीच नियोजन करत असते. यंदाही मंदिरातील विविध विकासकामे पूर्णत्वास आली असून काही कामे पूर्णही झाली आहेत.

विद्यापीठ दरवाजासमोर चप्पल स्टँड उभारले आहे. विद्युत वाहिन्या भुमिगत केल्या असून त्यामुळे यंदा नवरात्रोत्सवात मंदिराचे सौंदर्य अधिक खुलणार आहे. त्यासोबत महिला व पुरूष भाविकांची गैरसोय होऊ नये यासाठी पागा बिल्डिंगमध्ये स्वच्छतागृहही खुले केले आहे. पिण्याच्या पाण्याची सुविधाही मंदिर परिसरात केली आहे.

बिंदू चौकात एलईडी वॉल

भाविकांना श्री अंबाबाईचे दर्शन घेता यावे, यासाठी परिसरासह बिंदू चौकात एलईडी वॉल उभ्या करण्यात येणार आहेत. त्याचेही काम अंतिम टप्प्यात आले असून बिंदू चौकात विद्युत विजेची जोडणी मिळाल्यानंतर येथेही भव्य एलईडी वॉल उभारण्यात येणार आहे.