कोडणी : गायकवाडी (ता. निपाणी) येथे बुधवारी (ता. १) मध्यरात्री चोरट्यांनी लक्ष्मी मंदिरातील दानपेटीसह मेढपाळांची चार कुलूपबंद घरे फोडली. त्यात १० तोळे सोने व १ लाख ४० रोकड लंपास करून डल्ला मारला. गुरुवारी (ता. २) सकाळी ही घटना उघडकीस आली. तसेच अन्य ३ ठिकाणीही चोरट्यांनी चोरीचा प्रयत्न केला आहे. या धाडसी चोरी झाल्यामुळे परिसरात भीतीचे वातावरण पसरले आहे.

याबाबत अधिक माहिती अशी, चोरट्यांनी बुधवारी मध्यरात्री कुलूपबंद घरांना लक्ष्य केले. यावेळी सोमा बाबू रेवडे यांच्या घरातील ५ हजार रोकड व २ तोळे सोने, विठ्ठल कुणाप्पा डोणे यांच्या घरातील ३० हजार रोकड व अर्धा तोळे सोने, लक्ष्मण कुशाप्पा लांडगे यांच्या घरातील ५० हजार रोख व एक तोळे सोने आणि अवघडी बिरू अनुसे यांच्या घरातील तिजोरी फोडून 50 हजाराची रोकड व सहा तोळे सोने असा मुद्देमाल चोरट्यांनी हस्तगत केला आहे. चोरी झालेली सर्व कुटुंबे मेंढपाळ आहेत. कुटूबांतील सर्व सदस्य घरांना कुलूप लावून बकऱ्यांच्या कळपात गेले होते. नेमकी हीच संधी साधून चोरट्यांनी चोरीचा डाव साधला. गुरुवारी दुसऱ्या दिवशी शेजाऱ्यांनी चोरी झाल्याची माहिती या कुटुंबांना दिल्यानंतर माहिती निपाणी ग्रामीण पोलिसांना देण्यात आली. त्यानंतर पोलिसांनी घटनास्थळी जाऊन पंचनामा केला.

दानपेटी फोडून ओढ्यानजिक टाकली

गायकवाडी येथील लक्ष्मी मंदिरातील दानपेटी चोरट्यांनी फोडली असून त्यातील ४ ते ५ हजार रुपये हस्तगत केल्याची शक्यता वर्तवली जात आहे. ही दानपेटी फोडून चोरट्यांनी ओढ्यानजिक टाकून दिल्याचे नागरिकांच्या निदर्शनास आले. तसेच येथील बिरदेव बकरी सोसायटी या ठिकाणीही चोरट्यांनी कुलूप तोडून चोरीचा प्रयत्न केला. मात्र सोसायटीत लाॅकर असल्यामुळे चोरट्यांना चोरीचा डाव साधता आला नाही.

चोरट्यांनी नेमकी संधी साधली

बुधवारी रात्रभर गायकवाडीत वीज पुरवठा खंडित झाला होता. तसेच रात्रभर जोरदार पाऊस सुद्धा सुरू होता. त्यामुळे चोरट्यांनी नेमकी हीच संधी साधून चोरीचा यशस्वी प्रयत्न केला आहे. गायकवाडी येथे यापूर्वीही चोरट्यांनी मेंढपाळांच्या कुलूपबंद घरांना लक्ष केले होते. त्यामुळे आता नागरिकांनी दक्ष राहण्याची गरज निर्माण झाली आहे.