आष्टा - आष्टा-बागणी मार्गावरील एका हॉटेलसमोर गावठी कट्टा विक्रीसाठी आलेल्या कोल्हापूर जिल्ह्यातील तरुणास पोलिसांनी सापळा रचून रंगेहाथ पकडले. विशाल आनंदा शिंदे (वय २९, घुणकी, ता. हातकणंगले) असे अटक करण्यात आलेल्या तरुणाचे नाव आहे. त्याच्याकडून एक गावठी कट्टा आणि दोन जिवंत काडतुसे असा १२ हजारांचा मुद्देमाल जप्त करण्यात आला आहे. स्थानिक गुन्हे अन्वेषण विभागाच्या पथकाने ही कारवाई केली.

अधिक माहिती अशी, की अवैध शस्त्र बाळगणाऱ्यांवर कारवाईचे आदेश पोलिस अधीक्षक दीक्षित गेडाम यांनी दिले होते. त्यानुसार एलसीबीचे निरीक्षक अजय सिंदकर यांच्या नेतृत्वाखाली खास पथके तयार करण्यात आली आहेत. पथकातील पोलिस आष्टा येथे गस्तीवर होते. यावेळी पथकातील अंमलदार ऋषिकेश सदामते यांना माहिती मिळाली. आष्टा ते बागणी रोडवर असलेल्या हॉटेल जायंट्स हॉलच्या समोर एक तरुण पिशवीतून पिस्तूल घेऊन ते विक्रीसाठी आला आहे.

मिळालेल्या माहितीनुसार पोलिस उपनिरीक्षक विशाळ येळेकर यांच्या पथकाने त्याठिकाणी छापा मारून विशाल शिंदे यास ताब्यात घेतले. त्यावेळी त्यांची झडती घेतली असता पिशवीत एक गावठी कट्टा, दोन जिवंत काडतुसे असे मिळून आले. गावठी कट्टा व जिवंत काडतुसांबाबत विचारणा केली असता ती विक्रीकरिता आणल्याचे त्याने सांगितले. त्यावेळी त्याच्याजवळील एक गावठी कट्टा, दोन जिवंत काडतुसे जप्त करून संशयित व मुद्देमाल आष्टा पोलिस ठाण्यास सुपूर्द करण्यात आला आहे. कारवाईत उपनिरीक्षक येळेकर, मेघराज रुपनर, मच्छिंद्र बर्डे, राहुल जाधव, दीपक गट्टे यांचा सहभाग होता.