इस्लामपूर : राज्य सरकारने जाहीर केलेल्या प्रतिलिटर पाच रुपये दूध अनुदानासाठी (Milk Subsidy) सांगली जिल्ह्यातील दूध संकलन संस्थांमार्फत ७९ हजार ३६२ प्रस्ताव आले होते. त्या प्रस्तावानुसार शेतकऱ्यांच्या (Farmers) बँक खात्यावर (Bank Account) ९ कोटी ५० लाख रुपये जमा करण्याची प्रक्रिया सुरू झाल्याची माहिती जिल्हा दुग्ध व्यवसाय विकास अधिकारी नामदेव दवडते यांनी दिली.

या अनुदान योजनेनुसार दूध उत्पादक शेतकऱ्यांनी जनावराच्या टॅगिंग व आनुवंशिकतेविषयी शासनाच्या संकेतस्थळावर ऑनलाइन माहिती भरणे आवश्यक आहे. संबंधित संस्थेने दूध उत्पादक शेतकऱ्यांच्या खात्यावर प्रतिलिटर दुधाला २७ रुपये जमा केले की, शासन ५ रुपयाचे अनुदान देणार आहे. त्यानुसार खासगी व सहकारी संस्थांना दूध पुरवठा करणाऱ्या शेतकऱ्यांना या योजनेचा लाभ झालेला आहे.

दाखल प्रस्तावांची छाननी सुरू असून ती पूर्ण होताच पुढील आठवड्यात आणखी अनुदान वितरित होणार असल्याचे त्यांनी सांगितले. जनावरांच्या टॅगिंगसह आनुवंशिक माहिती वेळेवर ऑनलाइन भरण्याचे प्रमाण सुरवातीस कमी होते. दूध संस्थांच्या मागणीचा जाणीवपूर्वक विचार करून दुग्ध व्यवसाय विकास सचिव तुकाराम मुंढे यांनी अधिकाधिक शेतकऱ्यांना योजनेचा लाभ देण्यास प्राधान्य दिले आहे. त्यामुळे प्रादेशिक दुग्ध व्यवसाय विकास अधिकारी कार्यालय आणि आयुक्तालयात परिपूर्ण प्रस्तावांची संख्या वाढली.

छाननीअंती अशा प्रस्तावांची मंजुरी मिळाल्याने थेट दूध उत्पादक शेतकऱ्यांच्या बँक खात्यावर अनुदान वितरित होऊ लागले आहे. दूध अनुदान योजनेंतर्गत ११ जानेवारी ते १० मार्चपर्यंतच्या कालावधीत दूध उत्पादक शेतकऱ्यांची माहिती संगणक प्रणालीमध्ये भरण्यासाठी १५ एप्रिलपर्यंत मुदत वाढ देण्यात आली आहे. तसेच २६ मार्चपर्यंत ज्या जनावरांची पडताळणी झालेली असेल, त्यांचा समावेश यामध्ये करण्यात येणार आहे.

अपूर्ण प्रस्तावांचा फटका

वाळवा तालुक्यातील हुतात्मा सहकारी दूध संघाने परिपूर्ण प्रस्ताव दाखल केलेले नाहीत. त्यामुळे त्या संबंधित दूध उत्पादक शेतकरी शासनाच्या दूध अनुदानापासून वंचित राहणार आहेत.

महाराष्ट्रामध्ये प्रथमच थेट दूध उत्पादक शेतकऱ्यांच्या बँक खात्यावर अनुदान देण्याची योजना दुग्ध व्यवसाय विकास सचिव तुकाराम मुंढे यांनी विशेष संगणक प्रणालीमार्फत राबवलेली आहे. त्याचा लाभ संबंधित शेतकऱ्यांना झालेला आहे. पॅकिंग आणि फार्मर आयडीमुळे यापुढे भविष्यात येणाऱ्या विविध योजनांचा लाभ शेतकऱ्यांना देण्यात येईल.

-प्रशांत मोहोड, दुग्ध व्यवसाय विकास आयुक्त, मुंबई

दृष्टिक्षेपात...

सांगली जिल्ह्यातून दूध अनुदानासाठी आलेले प्रस्ताव - ७९ हजार ३६२

दाखल केलेल्या प्रस्तावाकरिता जमा अनुदान - ९ कोटी ५० लाख रुपये

प्रकल्पनिहाय अनुदान

• चितळे डेअरी भिलवडी - ६ कोटी रुपये

• राजारामबापू पाटील दूध संघ, इस्लामपूर - १ कोटी ६५ लाख रुपये

• हेमंतबाबा देशमुख दूध प्रकल्प, आटपाडी - ६८ लाख रुपये

• अग्रणी दूध प्रकल्प मांजर्डे - ६३ लाख रुपये

• श्रीनिवासा मिल्क, मिरज - ४० लाख रुपये

• छोटे ७ प्रकल्प - १४ लाख रुपये