Ajara: किणे (ता. आजरा) येथील एका सर्वसामान्य शेतकरी कुटुंबातील तरुण अमेरिकेतील नासापर्यंत पोहोचला आहे. हाॅवर्ड विद्यापीठातून त्यांची नासाच्या प्रकल्पासाठी निवड झाली आहे. आजरा तालुक्यातील किणेसारख्या ग्रामीण भागातील चंद्रकांत शेंदरकर यांनी घेतलेली ही झेप कौतुकाचा विषय ठरली आहे. जिद्द, चिकाटी, कष्ट याच्या जोरावर त्यांनी या यशाला गवसणी घातली आहे. ते, नासासाठी ढगांवरील संशोधन प्रकल्प करणार आहेत.

शेंदरकर यांचा जन्म किणे येथील शेतकरी कुटुंबात झाला. त्यांचे वडील गिरणी कामगार होते. त्यांचे बारावीपर्यंतचे शिक्षण दादर (मुंबई) मधील सानेगुरुजी विद्यालयात झाले. बारावीतील गुणांवर त्यांची आयआयटी निवड झाली. मात्र, आर्थिक अडचणींमुळे त्यांना तेथेपर्यंत जाता आले नाही. त्यामुळे त्यांनी आजरा महाविद्यालयामध्ये गणित विषय घेऊन बी.एस्सी. पूर्ण केले. त्यांनी शिवाजी विद्यापीठामध्ये गणितामध्ये एम.एस्सी. केले.

पदव्युत्तर शिक्षणानंतर त्यांनी मुंबईमध्ये नोकरी करीत ‘सीडॅक’चा अभ्यासक्रम पूर्ण केला. त्यानंतर एमआयटीचा अभ्यासक्रम पूर्ण केला. सीटी बॅंकेमध्ये काही काळ नोकरी केल्यावर सध्या ते जेपी मॉर्गन बॅंकेत अधिकारी पदावर काम करीत आहेत. बॅंकेत काम करताना त्यांनी हाॅवर्ड विद्यापीठातून डेटा सायन्स (एम. एल.) या अभ्यासक्रमाला प्रवेश घेतला. हा ऑनलाईन अभ्यासक्रम पूर्ण केल्यावर ते, हॉवर्डमध्ये शिक्षण घेत आहेत.

नासाच्या या प्रकल्पासाठी चौघांची निवड झाली आहेत. त्यात दोन भारतीय आहेत. त्यापैकी एक शेंदरकर आहेत. ढगांवर अभ्यास व संशोधन प्रकल्प नासा या संस्थेसाठी करणार आहेत. आर्थिक अडचणींचा कोणताही बाऊ न करता त्यांनी आपले ध्येय गाठले आहे. त्यांच्या जडणघडणीमध्ये आई, वडील, पत्नी व भाऊ यांचे पाठबळ आहे

"गणित हा माझा लहानपणापासून आवडता विषय आहे. त्यात करिअर करण्याची संधी मिळाली. यातून आंतरराष्ट्रीय पातळीवरील नासा या संस्थेत संशोधन व अभ्यासाची संधी मिळाली, याचे वेगळे समाधान आहे."

- चंद्रकांत शेंदरकर