बेळगाव : भरधाव ट्रकने इंडो-तिबेटियन बॉर्डर पोलिस (आयटीबीपी)च्या बसला जोराची धडक दिल्याने बसमधील सात जवान जखमी झाले. पुणे-बंगळूर राष्ट्रीय महामार्गावरील सुतगट्टी घाटातील राम ढाब्याजवळ शुक्रवारी (ता. २५) रात्री हा अपघात घडला. याप्रकरणी आयटीबीपीचे साहाय्यक कमांडंट प्रवाह परिमळ यांनी फिर्याद दिली असून अपघाताची नोंद काकती पोलिस ठाण्यात झाली आहे.

राजेश गुप्ता (वय २८), सकाना रोहित (वय २९), गोपाळ सुमान (वय २७), दाबी दिनेश (वय २९), श्‍यामलाल (वय ५३), राशपाल सिंग (वय ५०) आणि ई. शिवकुमार (वय ४३) अशी जखमी जवानांची नावे असून त्यांच्यावर जिल्हा रुग्णालयासह एका खासगी रुग्णालयात उपचार करण्यात आले. 

हेही वाचा - विरोधक पुन्हा एकत्र ? राष्ट्रवादीत दोन गट झाल्याने नवे वळण -

शुक्रवारी रात्री पुणे-बंगळूर राष्ट्रीय महामार्गावरून संकेश्‍वरकडे ट्रक (एमएच ०९ सीयू ८८११) भरधाव वेगाने जात होता. सुतगट्टी घाटात राम ढाब्याजवळ महामार्ग ओलांडण्याच्या प्रयत्नात असलेल्या आयटीबीपीच्या बसला ट्रकने जोराची धडक दिली. या अपघातात बस महामार्गावर उलटली. त्यामुळे यात सात जवान जखमी झाले. अपघाताची माहिती समजताच काकती पोलिसांनी घटनास्थळी भेट देऊन पंचनामा केला. क्रेनच्या साहाय्याने अपघातग्रस्त वाहने महामार्गावरून हटविण्यात आली.

संपादन - स्नेहल कदम