नगरः शहरातील मोकाट जनावरांच्या प्रश्नावर नगरसेवकांनी, दोनच दिवसांपूर्वी निवृत्त झालेले आयुक्त श्रीकृष्ण भालसिंग यांना घेराव घालून आंदोलन केले होते. त्यानंतर महापालिका प्रशासनाने मोकाट जनावरांवरील कारवाईचा कृतिआराखडा तयार करण्याचे आश्वासन दिले. यावर लवकरच कार्यवाही सुरू करण्यात येईल, असेही सांगितले. मात्र, महापालिकेकडून त्यावर कोणतीही कार्यवाही झालेली नाही. मोकाट जनावरे पकडण्यासाठी व त्यांचे संगोपन करण्यासाठी मनुष्यबळ कमी पडत असल्याने, कारवाईचा कृतिआराखडा कागदावरच उरला आहे. त्यामुळे महापालिकेची मोकाट जनावरांवरील कारवाईची वल्गना "फार्स' ठरत आहे. 

हेही वाचा ः परीक्षे आधीच निकाल 

जिल्हाधिकारी तथा प्रभारी महापालिका आयुक्‍त राहुल द्विवेदी यांनी या संदर्भात आज सायंकाळी महापालिका अधिकाऱ्यांची बैठक घेऊन सूचना दिल्या. महापालिकेकडे शहरात पकडलेल्या मोकाट कुत्र्यांचे निर्बीजीकरण करण्याचा प्रकल्प पिंपळगाव माळवी येथे आहे. या प्रकल्पात मोकाट कुत्री ठेवण्यासाठी जागा कमी पडत असल्याने, महापालिकेने तीन नवीन शेड तयार करण्याचे काम सुरू केले आहे. यातील दोन शेड तयार झाल्या आहेत. तिसऱ्या शेडचे काम सुरू आहे. मोठी मोकाट जनावरे ठेवण्यासाठी महापालिकेकडे वडगाव गुप्ता रस्त्यावर जागा आहे; मात्र तेथे जनावरे ठेवण्यासाठीचे बांधकाम सुरूच झालेले नाही. त्यामुळे महापालिकेने मोठी मोकाट जनावरे पकडली तर ठेवायची कोठे, असा प्रश्‍न निर्माण होतो. यावर तोडगा म्हणून महापालिका प्रशासन या जनावरांवर कारवाई करण्याचे टाळत आहे. 

वाहतुकीला अडथळा 

शहरातील मोकाट जनावरांवर कारवाई करावी, या मागणीसाठी नगरसेवकांनी तत्कालीन महापालिका आयुक्‍तांना विधानसभा निवडणुकीच्या आधी घेराव घातला होता. त्या वेळी तत्कालीन आयुक्‍त भालसिंग यांनी शहरातील मोकाट जनावरांवर कारवाईसाठीचा कृतिआराखडा तयार करण्याचे आदेश दिले होते. महापालिकेकडील कोंडवाडा विभागाकडे पुरेसे मनुष्यबळ नाही. भालसिंग सेवानिवृत्त झाले तरीही हा आराखडा कागदावरच राहिला आहे. महापालिका प्रशासनाकडून कारवाई होत नसल्याने शहरातील मोकाट जनावरांच्या प्रमाणात व त्रासात वाढ झाली आहे. शहरातील रस्त्यांवर दिसणारी जनावरे आता महामार्गांवरही आपले बस्तान बसवू लागली आहेत. त्यामुळे शहरातील वाहतुकीला अडथळा निर्माण होत आहे. खड्डेयुक्‍त रस्त्यांवरून जनावरांचा अडथळा पार करत चालणे नगरकरांना कठीण झाले आहे.