Sakal Survey - पश्चिम महाराष्ट्राचा विचार केल्यास राष्ट्रवादी काँग्रेसचा बालेकिल्ला म्हणून ओळख दृढ आहे; मात्र या बालेकिल्ल्याला सुरुंग लागला आहे. कोल्हापूर जिल्ह्यातील दोन्ही आमदार उपमुख्यमंत्री अजित पवार यांच्यासमवेत गेले आहेत. त्यामुळे कोल्हापूर जिल्हा अजित पवारांबरोबर गेल्याचे सकृतदर्शनी दिसत असले तरी कार्यकर्त्यांच्या मनात ‘साहेब’ आणि कृतीमध्ये ‘दादा’ असल्याचे जाणवते.

सांगली जिल्ह्यात राष्ट्रवादी काँग्रेस अभेद्य आहे. अजित पवार यांनी उचललेल्या पावलामुळे कोल्हापूर जिल्ह्यात राष्ट्रवादी काँग्रेसला जोरदार धक्का बसला आहे. पक्षाध्यक्ष शरद पवार यांच्या मागे नेहमीच ठामपणे उभा राहिलेल्या आणि पक्षाचा बालेकिल्ला असलेल्या या जिल्ह्यातील पक्षाचे दोन्हीही आमदार तसेच जिल्हाध्यक्षांसह जिल्हा बँक, ‘गोकुळ’चे संचालकांनीही दादांचे नेतृत्‍व स्वीकारले आहे.

माजी आमदार के. पी. पाटील यांचा निर्णय अद्याप झालेला नाही. त्यामुळे शरद पवार यांच्यासोबत नेहमीच असलेले व्ही. बी. पाटील, आर. के. पोवार यांच्यासह काही जुने कार्यकर्ते एकत्र येऊन पक्षाची मोट पुन्हा बांधण्याचा प्रयत्न करत आहेत.

‘राष्ट्रवादी’चे प्रदेशाध्यक्ष जयंत पाटील यांच्या सांगली जिल्ह्यातील पक्ष मात्र अभेद्य असल्याचे चित्र आहे. जिल्ह्यात विधानसभेचे तीन व परिषदेचा एक असे चार आमदार आहेत आणि सध्या ते सर्व शरद पवार यांच्यासोबत आहेत. पक्षाचे जिल्हाध्यक्षही शरद पवार यांच्यासोबतच आहेत.