श्रीगोंदे : विधानसभा आणि लोकसभा निवडणुकांना अद्यापि अवकाश आहे. मध्यावधीही होण्याची शक्‍यता नाही. परंतु श्रीगोंद्यातील वहिनीसाहेबांनी थेट मंत्रिपदाची घोषणा केलीय. विशेष म्हणजे सध्या त्या आमदारही नाहीत. त्यामुळेच श्रीगोंदाच नव्हे तर संपूर्ण नगर जिल्ह्याचे त्यांच्या या मंत्रिपदाच्या घोषणेने लक्ष वेधले आहे. त्यांचे विरोधक मात्र, या घोषणेने बुचकळ्यात पडले आहेत. 

पांघरून घेणाऱ्या निष्ठावंतांना उत्तर
या वहिनीसाहेब म्हणजे अनुराधाताई नागवडे. मंत्री होण्यासाठी अर्थातच आमदारकी अगोदर जिंकावी लागेल. आणि त्याचीच तयारी त्यांनी सुरू केली आहे. ज्येष्ठ नेते दिवंगत शिवाजीराव नागवडे (बापू) यांचे निष्ठावंत असे पांघरून घेणाऱ्या जवळच्या काही निष्ठावंतांना थेट उत्तर देत जिल्हा परिषद सदस्य अनुराधा नागवडे यांनी काल (सोमवारी) आक्रमक रूप दाखविले. 
""बापूंनी समाजासाठी खूप दिले; मात्र आता त्यांचे राहिलेले स्वप्न पूर्ण करण्याची जबाबदारी आपली आहे. त्यातीलच एक मंत्रिपदाचे स्वप्न आपण संतांचा आशीर्वाद आणि समाजाची साथ घेऊन पूर्ण करू,'' अशी घोषणा करून त्यांनी आमदारकीची तयारी सुरू केल्याचे संकेत दिले. 

हेही वाचा :  बापूसमर्थकांचं ठरलं, राजूदादांचं पितळ उघडं पाडणार 

बापूंच्या जयंतीदिनी घोषणा 
शिवाजीराव नागवडे यांच्या जयंतीनिमित्त झालेल्या कार्यक्रमात अनुराधा नागवडे यांनी पहिल्यांदाच आक्रमकपणा दाखविला. त्यांच्या भाषणाला असणारी धार अनेकांच्या भुवया उंचावणारी ठरली. बापूंच्या जवळचे काही जण बापूंचे राजकीय संस्कार असल्याचे सांगत आहेत, असा संदर्भ देत त्या म्हणाल्या, ""तुमच्यावर जर बापूंचे संस्कार आहेत, तर त्याचे दोन पुत्र राजेंद्र आणि दीपक यांनी वडिलांकडून काही तरी घेतले असेलच ना! केवळ दिशाभूल करण्यासाठी खटाटोप सुरू असतो. कारखान्याची सत्ता लोकांसाठीच असते, हे राजेंद्र नागवडे यांनी कृतीतून दाखविताना वडिलांचे संस्कार दाखवून दिले आहेत.'' 

संतांचा आशीर्वाद 
बापूंचे काही स्वप्न पूर्ण करायचे असल्याचे सांगत नागवडे म्हणाल्या, ""कारखान्याचा कारभार चांगला चालविणे हा जसा त्यातीलच एक भाग आहे, तसा राज्य मंत्रिमंडळात स्थान मिळविणे हेही त्यांचे स्वप्न होते. आता गुरुमाऊली अण्णासाहेब मोरे यांच्यासारख्या संतांचे आशीर्वाद आणि समाजाचे पाठबळ या जोरावर ते आपण पूर्ण करून दाखवू.''