वालचंदनगर - पुणे जिल्हा परिषदेच्या महिला व बालकल्याण विभागाच्या माध्यमातुन इंदापूर तालुक्यातील इयत्ता पाचवी व सहावीमधील ७२८ मुलींना सायकलीसाठी ३२ लाख ७६ हजार रुपयांचा निधी मंजूर झाला आहे. याची माहिती पुणे जिल्हा परिषदेचे बांधकाम व आरोग्य समितीचे सभापती प्रवीण माने यांनी दिली.

पुणे जिल्हा परिषदेच्या माध्यमातुन माहिला व बालकल्याण विभागातर्फे सन २०१८-१९ मधील दहा टक्के निधीमधून इयत्ता पाचवी व सहावीमधील ७२८ मुलींसाठी ३२ लाख ७६ हजार रुपयांचा निधी मंजूर झाला आहे. एका मुलीला सायकल घेण्यासाठी साडेचार हजार रुपयांचे अनुदान देण्यात येणार आहे. 

सायकल खरेदी करुन पावती दिल्यानंतर संबधित लाभार्थीच्या खात्यावर साडेचार हजार रुपयांचे अनुदान मिळणार आहे. इंदापूर तालुक्यातील अनेक मुलींना शाळेमध्ये ये-जा करण्यासाठी पायपीट करावी लागत होती.  इयत्ता पाचवी व सहावीतील मुलींना सायकल मिळणार असल्याने शाळेमध्ये ये-जा करण्याचा प्रवास सोईस्कर होणार आहे. तसेच शाळेमधील मुलींच्या गळती प्रमाण कमी होण्यास मदत होणार आहे. बारामती लोकसभा मतदार संघाच्या खासदार सुप्रिया सुळे यांच्या मार्गदर्शनाखाली तालुक्यामध्ये महिलांना व मुलींना सक्षम करण्यासाठी पुणे जिल्हा परिषदेच्या माध्यमातुन प्रयत्न सुरु असल्याचे सभापती प्रवीण माने यांनी सांगितले.