नगर : स्थानिक स्वराज्य संस्थांच्या निवडणुकांमध्ये महिलांना 50 टक्के आरक्षण असले, तरी स्थानिक स्वराज्य संस्थांमध्ये कार्यरत असलेल्या महिलांना मात्र पुरस्कारांमध्ये तेवढे स्थान दिले जात नसल्याचे आता स्पष्ट होत आहे. जिल्हा परिषदेच्या ग्रामपंचायत विभागात ग्रामसेवक व ग्रामविकास अधिकारी म्हणून कार्यरत असलेल्या महिलांना नेहमीच पुरस्कारात कमी स्थान दिले जात आहे. आम्ही पुरस्काराच्या योग्यतेचे नाही काय, असाच सवाल करत काही जणींनी खंतही व्यक्त केली. 

येथे क्‍लिक करा हे आधार कुणाचे? 

जिल्ह्यात 1316 ग्रामपंचायती असून, त्यांसाठी ग्रामविकास अधिकारी व ग्रामसेवकांची एकूण 1205 पदे मंजूर आहेत. त्यामध्ये ग्रामसेवकांच्या 952, तर ग्रामविकास अधिकाऱ्यांच्या 253 पदांचा समावेश आहे. जिल्ह्यात ग्रामसेवकांची 857, तर ग्रामविकास अधिकाऱ्यांची 227, अशी एकूण 1084 पदे भरलेली आहेत. यामध्ये ग्रामसेवक म्हणून 222 आणि ग्रामविकास अधिकारी म्हणून नऊ महिला कार्यरत आहेत. घर सांभाळून महिला गावगाड्याचा कारभार चोखपणे पार पाडत आहेत. 

हेही वाचा ... तर मराठवाड्याचा पाणीप्रश्‍न मिटेल 

विशेष म्हणजे, पुरुष ग्रामसेवक व ग्रामविकास अधिकाऱ्यांप्रमाणेच महिलांनाही एकापेक्षा जास्त ग्रामपंचायती सांभाळण्याची जबाबदारी दिलेली आहे. या सर्व जबाबदाऱ्या विनातक्रार व कोणाच्या तक्रारी येऊ न देता त्या चोख पार पाडत आहेत. असे असतानाही पुरस्कार देताना प्रशासनाकडून त्यांचा विचार होत नाही. जिल्ह्यातील सुमारे 58 ग्रामसेवकांच्या विभागीय चौकशा सध्या सुरू आहेत. त्यांत फक्त दोनच महिला कर्मचाऱ्यांचा समावेश आहे. 

हेही पाहा बुलेट ट्रेन नको; पिण्याचे पाणी द्या : तनपुरे 

महिलांचे काम चांगले असतानाही त्यांना आदर्श ग्रामसेवक पुरस्कारांमध्ये मात्र मानाचे स्थान मिळत नसल्याने, महिला ग्रामसेवक व ग्रामविकास अधिकाऱ्यांमधून नाराजी व्यक्त केली जात आहे. दर वर्षी महिलांपेक्षा पुरुषांनाच हे पुरस्कार दिले जात आहेत. स्थानिक स्वराज्य संस्थांमध्ये जसे महिलांना 50 टक्‍क्‍यांचे आरक्षण दिले, तसेच पुरस्कारांमध्ये महिलांनाही स्थान द्यावे, अशी मागणी होत आहे. 

महिलांचे काम उत्कृष्ट 
महिलांचे काम उत्कृष्ट आहे. प्रत्येक महिलेने आपले काम सिद्ध करून पुरस्कारासाठी प्रस्ताव पाठविणे गरजेचे आहे. संघटनेच्या माध्यमातून आम्ही महिलांना नेहमीच प्रोत्साहन देत असतो. 
- एकनाथ ढाकणे, जिल्हाध्यक्ष, ग्रामसेवक संघटना 

पदे मंजूर : 1205 
कार्यरत : 1084 
ग्रामसेवक : पुरुष : 635, महिला : 222 
ग्रामविकास अधिकारी : पुरुष : 218, महिला : नऊ 

हे पाहा विधानसभेत कर्जत-जामखेडचा "आवाज'