सोलापूर : आरक्षण केंद्राबाहेर थांबून गरज नसताना तिकीट काढून ज्यादा पैसे घेऊन प्रवाशांना तिकीटे विकणाऱ्या एजंटांवर कारवाईचे निर्देश रेल्वे प्रशासनाने दिले आहेत. मध्य रेल्वे विभागाने विशेष पथकांची नियुक्‍ती केली असून त्यामध्ये आरपीएफचे जवान व तिकीट तपासणीसांचा समावेश करण्यात आला आहे. गर्दीच्या कालावधीत एजंटांच्या टोळ्यांकडून प्रवाशांची लूट होऊ नये या हेतूने 26 जानेवारीपर्यंत विशेष मोहीम हाती घेण्यात आली आहे. 

हेही वाचा - संजयमामांच्या पुतण्याचा सभापती निवडीत पराभव 

मध्य रेल्वेच्या सोलापूर विभागातील शिर्डी, नगर, कोपरगाव, दौण्ड, कुर्डूवाडी, पंढरपूर, सोलापूर, लातूर, वाडी, कलबुर्गी, बेलापूर या रेल्वे स्थानकांवरील तिकीट आरक्षण केंद्रांसाठी विशेष पथकांची नियुक्‍ती करण्यात आली आहे. सोलापूर विभागातील 616 तिकीट तपासणीसांपैकी सुमारे 100 तिकीट तपासणीसांची नियुक्‍ती करण्यात आली आहे. तर आरपीएफ जवानांनाही एजंटांवरील कारवाईत तिकीट तपासणीसांना सहकार्य करण्याचे निर्देश सुरक्षा आयुक्‍त मिथुन सोनी यांनी दिले आहेत. तिकीट आरक्षण केंद्रांवर अचानक धाडी टाकल्या जात असून कारवाई गुपीत ठेवली जात आहे. एप्रिल ते डिसेंबर 2019 या कालावधीत मध्य रेल्वेने फुकट्या प्रवाशांकडून सुमारे 700 कोटींचा दंड वसूल केल्याचे रेल्वेतील अधिकाऱ्यांनी सांगितले. 

हेही वाचा - अकरावीच्या विद्यार्थीनीची आत्महत्या 

ठळक बाबी... 

• एप्रिल ते डिसेंबर या काळात फुकट्या प्रवाशांना केला 155.14 कोटींचा दंड 
• प्रवाशांकडील तिकीट तपासणीसाठी 657 तिकीट तपासणींची गरज : प्रत्यक्षात 616 तिकीट तपासणीस 
• सोलापूर विभागातील 11 मोठ्या रेल्वे स्थानकांवरील तिकीट आरक्षण केंद्रांबाहेर विशेष पथकांची नजर 
• 26 जानेवारीपर्यंत विशेष मोहीम : सरपराईज भेट अन्‌ छुप्या सीसीटीव्हीच्या माध्यमातून एजंटांवर लक्ष