कडेगाव (सांगली)-आम्ही नाही तर मग कुणीच नाही हा सांगली येथील कॉंग्रेसमधील ट्रेंड घातक आहे, असा टोला शरद पवार यांनी काल कॉंग्रेसमधील अंतर्गत गटबाजीवर लगावला होता. याबाबत आज महसूलमंत्री व कॉंग्रेसचे प्रदेशाध्यक्ष बाळासाहेब थोरात यांना येथे पत्रकारांनी छेडले असता, त्यांनी हे मला काय विचारताय, मी तर पाहुणा आहे, असे सांगत हात वर केले. 

काल मिरज येथे झालेल्या एका कार्यक्रमात शरद पवार यांनी सांगली विधानसभा मतदारसंघात झालेल्या गटबाजीवर पवार यांनी वसंतदादा पाटील यांच्या वारसांचे नाव न घेता टोलेबाजी केली होती. सांगली येथे या ट्रेंडमुळेच कॉंग्रेसच्या पृथ्वीराज पाटील यांचा निसटता पराभव झाला. तसेच येथे कॉंग्रेस,राष्ट्रवादी एकदिलाने लढली का,याबाबत मी सविस्तरपणे बोलणार नाही पण परंतु कार्यकर्त्यानी मला नेमके काय म्हणायचे आहे ते समजून घ्यावे, असा टोला लगावला होता.

जलसंपदामंत्री तथा पालकमंत्री जयंत पाटील यांनीही सांगलीत पृथ्वीराज पाटील यांच्या पाठीशी कॉंग्रेस, राष्ट्रवादीची संपूर्ण ताकद लावली असती व सर्वानी एकत्र येवून ताकदीने काम केले असते तर वेगळे चित्र दिसले असते, असे वक्तव्य केले होते. 

याबाबत आज कडेगाव येथे महसूल मंत्री व कॉंग्रेसचे प्रदेशाध्यक्ष बाळासाहेब थोरात हे आज सकाळी कडेगाव येथे महसुल विभागाच्या आढावा बैठकीसाठी आले होते. त्यावेळी पत्रकारांनी छेडले असता थोरात म्हणाले, ""हा सांगली येथील विषय असल्याने सांगलीवाल्यानी मला याबाबत कशाला विचारावे. पाहुण्यांना विचारावयाचा हा प्रश्न आहे काय?'' 

बाळासाहेब थोरात हे कॉंग्रेसचे प्रदेशाध्यक्ष आहेत. सांगलीतील कॉंग्रेस अंतर्गत गटबाजी नेहमीच कॉंग्रेससाठी डोकेदुखी ठरली आहे. त्यावर थेट शरद पवार यांनी विधान केले, तेही कॉंग्रेसच्या व्यासपीठावरून. त्यामुळे हा विषय कॉंग्रेससाठी "पाहुणे' म्हणून हलक्‍यात घेण्यासारखा नक्कीच नाही. त्यातही प्रदेशाध्यक्षांनी तर नाहीच नाही. त्यामुळे थोरातांनी हात वर केले असले तरी भविष्यात त्यांना या विषयात लक्ष घालावे लागणार आहे.