सौंदलगा (बेळगाव) : येथील राष्ट्रीय महामार्गावरील मांगूर फाट्यावर झालेल्या मोटर व दुचाकी अपघातात एकजण जागीच ठार झाल्याची घटना रविवारी (ता. 7) घडली. सचिन रामा कांबळे (वय ४५, रा. भाटनांगनूर) असे अपघातात ठार झालेल्याचे नाव आहे. तर मोटार चालकाचे नाव चंद्रशेखर आडनुर (रा. दावणगिरी) असे आहे. हा अपघात रविवारी (ता.७) दुपारी सव्वा दोन वाजण्याच्या सुमारास झाला.

घटनास्थळावरून मिळालेली माहिती अशी, चंद्रशेखर आडनुर हे एमजी व्हेक्टर मोटारीने (एमएच १४, जेएम २२५२) दावणगिरीहुन पुण्याकडे निघाले होते. सचिन रामा कांबळे हे दुचाकी (एमएच ०९ बीई २८०४) मांगूर फाटा रस्ता ओलांडताना मांगूर फाट्याजवळ आले असताना मोटारीची दुचाकीला जोराची धडक बसली. यामध्ये कांबळे हे जवळ शंभर फूट अंतरावर जाऊन पडल्याने त्यांचा जागीच मृत्यू झाला. मोटार चालकास किरकोळ दुखापत झाली आहे. मोटार व दुचाकीचे नुकसान झाले आहे.

घटनेची माहिती मिळताच हायवे पेट्रोलिंग ११२ पोलिस गाडी व ग्रामीण पोलिस ठाण्याचे उपनिरीक्षक अनिल कुंभार व सहकारी, जयहिंद कंपनीचे पेट्रोलिंग इन्चार्ज चेतन शिंदे, प्रवीण तळवार, रुपेश भोसले यांनी घटनास्थळी धाव घेऊन तातडीने १०८ रुग्णवाहिका बोलावून मृत व जखमीला निपाणीच्या महात्मा गांधी रुग्णालयात पाठविले. महामार्गावर थांबलेली वाहतूक पोलिस व जयहिंदच्या कर्मचाऱ्यांनी सुरळीत केली. घटनेची माहिती मिळताच नातेवाईक घटनास्थळी दाखल झाले होते. घटनेची नोंद ग्रामीण पोलिस ठाण्यात झाली आहे.