बेळगाव : मध्यवर्ती महाराष्ट्र एकीकरण समितीचे अध्यक्ष दीपक दळवी यांच्यावर करण्यात आलेल्या भ्याड हल्लाचे सीमाभागात पडसाद उमटू लागले आहेत. अनेक गावांमध्ये निषेध व्यक्त केला जात आहे. कर्नाटक सरकारच्या अधिवेशनाला प्रत्युत्तर देण्यासाठी समितीतर्फे महामेळाव्याचे आयोजन करण्यात आले होते. त्याला प्रत्युत्तर देण्यासाठी मेळाव्यावेळी मध्यवर्ती महाराष्ट्र एकीकरण समितीचे अध्यक्ष दीपक दळवी यांच्यावर हल्ला करण्यात आला आहे.

या भ्याड हल्ल्याचा सर्व स्तरातून जाहीर निषेध केला जात असून मंगळवारी बेळगाव, निपाणी, खानापूर आदी भाग पूर्णपणे बंद असणार आहेत. विद्यार्थ्यांना शाळेत न पाठवण्याचे आवाहन समितीतर्फे करण्यात आले आहे. अनेक संघटनांनी आतापासूनच उद्याच्या बंदला पाठिंबा देण्यास सुरुवात केली आहे. सध्या डेपो परिसरात तणावाचे वातावरण निर्माण झाले असून पोलिसांकडून कार्यकर्त्यांची अडवणूक सुरू आहे.