बेळगाव : परिवहन आंदोलन काळात सक्तीने बदली करण्यात आलेल्या परिवहन कर्मचाऱ्यांची बदली अखेर रद्द करण्यात आली आहे. त्यामुळे या कर्मचाऱ्यांना आपल्या मूळ जागी पुन्हा सेवा करण्याची संधी मिळाली आहे.

सहावे वेतन आयोगाच्या शिफारशींची अंमलबजावणी परिवहन कर्मचाऱ्यांनाही करावी. या मागणीसाठी कर्मचाऱ्यांनी ६ ते २१ एप्रिलपर्यंत आंदोलन छेडले होते. हे आंदोलन दडपण्यासाठी शासनाने परिवहन कर्मचाऱ्यांवर निलंबनाची कारवाई करण्यासह सक्तीची बदली प्रक्रिया राबविली होती. बेळगाव विभागातील ९७ कर्मचाऱ्यांना हावेरी, गदग अशा दूर ठिकाणी नियुक्त करण्यात आले होते. तर त्या विभागातील कर्मचाऱ्यांची बेळगाव विभागात बदली करण्यात आली होती.

यासह बेळगाव विभागातील आठ कर्मचाऱ्यांना बडतर्फ तर ५६ हुन अधिक कर्मचाऱ्यांना निलंबित करण्यात आले होते. या कारवाई विरोधात कर्मचाऱ्यांनी न्यायालयात धाव घेतली असून हे प्रकरण आता न्यायप्रविष्ट आहे. बेळगाव विभागातून ज्या कर्मचाऱ्यांची अन्यत्र बदली करण्यात आली, ते सर्व कर्मचारी आंदोलनात अग्रेसर होते. यातील अनेक कर्मचारी हे संघटनेचे पदाधिकारी होते. त्यामुळे आंदोलन दडपण्यात शासन देखील यशस्वी ठरले होते. अखेर उच्च न्यायालयाच्या आदेशानंतर परिवहन कर्मचारी संघटनेने आपले आंदोलन मागे घेतले.

दरम्यान आंदोलन मागे घेतले तरी, बदली प्रक्रिया पूर्ण झाल्यामुळे अनेक कर्मचाऱ्यांना बेळगावातून हावेरी आणि गदग येथे जाऊन काम करावे लागत होते. आपली बदली रद्द करून घेण्यासाठी अनेकांनी प्रयत्न सुरू केले होते. अखेर या प्रयत्नांना यश आले असून कर्मचाऱ्यांच्या बदल्या रद्द करण्यात आल्या आहेत. त्यामुळे गदग आणि हावेरी तसेच परिवहनच्या इतर आगारांमध्ये बदली होऊन जाऊन काम करणाऱ्या कर्मचाऱ्यांना पुन्हा आपल्या मूळ बेळगाव विभागात काम करण्याची संधी प्राप्त झाली आहे.