बेळगाव - सर्वसाधारण व स्थायी समिती बैठकीची नोटीस मराठीसह तिन्ही भाषेत देण्याच्या महापौर शोभा सोमणाचे यांच्या निर्णयावर सत्ताधारी भारतीय जनता पक्षातच मतभेद निर्माण झाल्याची माहिती मिळाली आहे. या निर्णयाला भाजपच्या कन्नड भाषिक नगरसेवकांनी विरोध केला आहे. त्यामुळे पहिल्या सर्वसाधारण बैठकीत झालेल्या या निर्णयाची अंमलबजावणी करताना महापौरांची दमछाक होणार आहे.

शुक्रवारी (ता. २१) झालेल्या महापालिकेच्या सर्वसाधारण बैठकीत महापौर शोभा सोमणाचे यांनी पुढील बैठकीची नोटीस मराठी, कन्नड व इंग्रजी अशा तिन्ही भाषेत देण्याचा आदेश बजाविला आहे. बैठकीत सत्ताधारी भाजप तसेच विरोधी गटातील मराठी नगरसेवकांनी या निर्णयाचे स्वागत केले.

बैठकीला उपस्थित कन्नड नगरसेवकांनी त्यावेळी या निर्णयाला विरोध केला नाही, पण बैठकीनंतर सत्ताधारी गटातील कन्नड नगरसेवकांनी या निर्णयाबाबत नाराजी व्यक्त केली आहे. त्यामुळे सत्ताधारी गटात मराठी व कन्नड असे दोन गट तयार झाले आहेत. महापौर निवडणुकीतही सत्ताधारी गटात भाषिक गट तयार झाले होते. महापौर व उपमहापौर ही दोन्ही पदे मराठी भाषिकांना मिळाल्यामुळे कन्नड नगरसेवक नाराज झाले होते. आता त्याची पुनरावृत्ती झाली आहे.

महापालिकेत यावेळी भारतीय जनता पक्षाला सत्ता मिळाली असली, तरी त्यात मराठी नगरसेवकांची संख्या जास्त आहे. विरोधी गटातही मराठी नगरसेवक आहेत. त्यामुळे महापालिकेच्या सर्वसाधारण बैठकीचे कामकाज मराठी भाषेतही चालते. महापालिकेत याआधी महाराष्ट्र एकीकरण समितीचे वर्चस्व होते, त्यामुळे महापालिकेत मराठी भाषेचे अस्तित्व टिकून राहिले.

महापालिकेच्या बैठकीची नोटीस व विषयपत्रिका आधीपासून कन्नड व मराठी अशा दोन्ही भाषेत दिली जाते. मात्र, भाजपची सत्ता आल्यावर मराठी भाषेला डावलण्यात आले. पहिल्या सर्वसाधारण बैठकीची नोटीस केवळ कन्नड भाषेत देण्यात आली. त्याआधीही अंदाजपत्रक पूर्वतयारी व अंदाजपत्रक बैठकीची नोटीस केवळ कन्नड भाषेतच देण्यात आली होती.

अंमलबजावणीचे आव्हान

मराठी भाषेत नोटीस देण्याची मागणी महाराष्ट्र एकीकरण समितीच्या नगरसेवकांनी याआधी केली होती. शुक्रवारी (ता. २१) झालेल्या सर्वसाधारण बैठकीच्या प्रारंभी भाजपचे नगरसेवक नितीन जाधव व त्यानंतर महाराष्ट्र एकीकरण समितीचे नगरसेवक रवी साळुंखे यांनी पुन्हा ही मागणी केली. महापौरांनी ही मागणी मान्य केली खरी, पण आता अंमलबजावणी करण्याचे आव्हान त्यांच्यासमोर आहे.