बेळगाव : सर्वांचे लक्ष लागून राहिलेल्या ग्रामपंचायत निवडणूक मतमोजणीस सकाळी 8 वाजल्यापासून बी. के. मॉडेल शाळेत सुरवात झाली. सकाळ पासूनच निकालाची उत्सुकता लागून राहिल्याने उमेदवार व त्यांच्या समर्थकांनी मत मोजणी केंद्राबाहेर प्रचंड गर्दी केली. तसेच 10 वाजल्यापासून निकाल हाती येत आहेत. मात्र वाहतुकीचे योग्य नियोजन न केल्याने काही ठिकाणी नागरिकांना त्रास सहन करावा लागत आहे. 

22 डिसेंबर रोजी झालेल्या पंचायत निवडणूकीत मतदान झाले. गेल्या काही दिवसांपासून प्रशासनातर्फे मत मोजणीची तयारी केली जात होती. सकाळी 8 वाजल्यापासून मतमोजणीचे काम हाती घेण्यात आले असून सायंकाळी उशिरापर्यंत निकाल लागण्याची शक्यता आहे. बी. के. मॉडेल हायस्कूलमध्ये मतमोजणीसाठी 55 ग्रामपंचायत निवडणुकीची मतमोजणी तीन टप्प्यात होणार आहे. कोविडच्या नियमावलीचे काटेकोरपणे पालन करण्यात आले आहे. त्यामुळे मत मोजणीवेळी फक्त उमेदवार किंवा त्यांचा अजेंट यांना प्रवेश दिला जात आहे.  

हेही वाचा - बेळगाव : निपाणीत चोख बंदोबस्तात ग्रामपंचायत निवडणूक मतमोजणीस सुरुवात -

निवडणूक अधिकाऱ्यांनी बेळगाव तालुक्‍यातील विविध ग्रामपंचायतीसाठी वेळ निर्धारित केला आहे. त्यानुसार सकाळी 8 ते 11 या वेळेत पहिल्या टप्प्यातील, 11 ते दुपारी 2 (अंदाजे)  या वेळेत दुसऱ्या टप्प्यातील आणि दुपारी 2 ते (अंदाजे) सायंकाळी 5 या वेळेत तिसऱ्या टप्प्यातील मतमोजणी काम हाती घेतले जाणार आहे. सकाळी पहिल्या टप्प्यात अंकलगी, धरणटी, बस्तवाड, कलखांब, तुमरगुद्दी, हिरे बागेवाडी, हिंडलगा, कुकडोळी, अष्टे, हांदिगनूर,मास्त मरडी, सुळगा (उ.), तुरमुरी, मुतगा, कुद्रेमनी, मंडोळी, कंग्राळी बी.के. बाळेकुंद्री के. एच. या ग्रामपंचायतींची मतमोजणी सुरू असून आता पर्यंत 6 निकाल हाती आले आहेत.

मत मोजणी केंद्राबाहेर मोठ्या प्रमाणात पोलीस बंदोबस्त ठेवण्यात आला आहे. बेळगावसह जिल्ह्यातील विविध तालुक्यातील केंद्रावरही मत मोजणीला सुरुवात झाली असुन गर्दी करण्यास पोलीस मज्जाव करीत आहेत. 

संपादन - स्नेहल कदम