बेळगाव : बेळगाव महापालिकेत (Belgaum Municipal Corporation) महापौर, उपमहापौर किंवा नगरसेवकांना कन्नड भाषेत (Kannada language) बोलण्याची सक्ती करणे योग्य नसल्याचे परखड मत जिल्हा पालकमंत्री सतीश जारकीहोळी (Satish Jarkiholi) यांनी व्यक्त केले आहे.

बेळगाव भाग आधी मुंबई (Mumbai) प्रांतात होता, त्यामुळे येथे मराठीचा प्रभाव होता. त्यामुळे नगरसेवक मराठी भाषेत बोलतात. शिवाय लोकशाहीत कोणीही कोणत्याही भाषेत बोलू शकतो, असेही पालकमंत्री जारकीहोळी म्हणाले. कन्नड भाषेत बोलावे की नाही हा नगरसेवकांचा (Marathi Corporator) व्यक्तिगत प्रश्न आहे. नागरसेवकांनी कन्नड भाषेत बोलण्याचा निर्णय स्वतःहून घ्यायला हवा. त्यांच्यावर जबरदस्ती करता येणार नाही, असेही ते म्हणाले.

महापालिकेचे प्रशासकीय कामकाज कन्नड भाषेतच चालते, केवळ बैठकीत नगरसेवक मराठी किंवा अन्य भाषेत बोलतात, त्यांनी कन्नड भाषेत बोलावे, यासाठीचे प्रयत्न सामंजस्याने व्हायला हवेत, अशी टिप्पणीही जारकीहोळी यांनी केली. जारकीहोळी यांनी शनिवारी बेळगावात पत्रकार परिषद घेतली.

त्यावेळी कन्नड प्रसारमाध्यमांच्या प्रतिनिधींनी महापालिकेच्या बैठकीत मराठी भाषेच्या होत असलेल्या वापराबाबत प्रश्न विचारला. महापालिकेची, राज्याची प्रशासकीय भाषा कन्नड असताना महापालिकेच्या बैठकीत महापौर, उपमहापौर, नगरसेवक मराठी भाषेत बोलतात, अशी तक्रार त्यांनी केली.

पण जारकीहोळी यांनी या विषयावर सडेतोड व परखड मत व्यक्त केले. २९ डिसेंबर रोजी झालेल्या महापालिकेच्या सर्वसाधारण बैठकीत सत्ताधारी व विरोधी गटाच्या बहुतेक नागरसेवकांनी आपले प्रश्न मराठी भाषेत मांडले. त्याविरोधात कन्नड माध्यमांनी वार्तांकन केले होते. शिवाय कन्नड संघटनांनी त्याविरोधात आंदोलन केले होते. मराठीत बोलल्याबद्दल राज्यशासन नोटीस बजावणार असल्याची वावडी उठविण्यात आली होती.

मराठीत नगरसेवकांना दिलासा

मनपाच्या पुढील बैठकीत मराठी नगरसेवक मराठी भाषेत बोलणार की नाही, असा प्रश्न उपस्थित झाला होता. पण जारकीहोळी यांनी याप्रकरणी घेतलेल्या भूमिकेमुळे मराठी नगरसेवकांना दिलासा मिळाला आहे.