संगमनेर ः पुरणपोळीच्या घासाबरोबर ओवाळणीच्या ताटातील चारतोळे सोन्याचे गंठण शेतकऱ्याच्या बैलाच्या पोटात गेले. दहा दिवस नैसर्गिकरित्या ते बाहेर पडेल यांची वाट पाहून थकलेल्या त्या कुटूंबाने अखेर पशुवैद्यकाच्या मदतीने शस्त्रक्रीया करुन, जठरातील गंठण बाहेर काढले.

संगमनेर तालुक्यातील रायते वाघापूर येथील प्रगतीशील शेतकरी बापूसाहेब प्रभाकर शिंदे यांच्या खिलारी बैलाने, शुक्रवार (ता. 30) रोजी बैल पोळ्याच्या दिवशी, पुरण पोळीचा नैवद्य खाताना ओवाळणीच्या ताटातून चार तोळे वजनाचे सोन्याचे गंठण गिळले होते.

रविवार पर्यंत ते शेणातून बाहेर न आल्याने, राजहंस दूध संघाचे केंद्राधिकारी डॉ. नारायण नेहे यांनी पोर्टेबल सोनोग्राफी यंत्राद्वारे तपासणी केली असता, ते पोटाच्या आतील चार कप्प्यांपैकी रेटीक्युलम या कप्प्यात आढळून आले. या दागिन्यासह लोखंडी तारेचे दोन तुकडेही त्या होते. सोमवार ( ता. 9) रोजी स्थानिक पातळीवर भुल देवून, शस्त्रक्रीया करुन गंठण काढण्यात आले. त्यांना डॉ. सोमनाथ चत्तर यांनी मदत केली.

जनावरांच्या चाऱ्यासह पोटात जाणाऱ्या धातूच्या वस्तू टोक किंवा धारदार असल्यास, अंतर्गत अवयवाला इजा होवून त्यात जनावराच्या जीवाला धोका पोचू शकतो. या बैलाच्या घासाबरोबर पोटात गेलेले गंठण पचनासाठी रवंथ करताना किंवा पचन झालेल्या अन्नाबरोबर बाहेर न आल्याने, ते रेटीक्युलम या कप्प्यात गुंतले होते. त्यामुळे शस्त्रक्रियेचा निर्णय घ्यावा लागला. एक तासाच्या अवधीत ही शस्त्रक्रिया पूर्ण होवून बैलाची प्रकृती व्यवस्थित आहे. - डॉ. नारायण नेहे, पशुचिकीत्सक,  केंद्राधिकारी, राजहंस दूध संघ, संगमनेर