हुक्केरी : बेळगावहून पाच्छापूरला निघालेली कर्नाटक राज्य परिवहन महामंडळाची बस हुक्केरी तालुक्यातील बस्सापूर येथे उलटली. बसचालकाचे वाहनावरील नियंत्रण सुटल्याने गुरुवारी (ता. ३१) सकाळी ही घटना घडली.केवळ दैव बलवत्तर म्हणूनच या अपघातात पाच जणांना किरकोळ दुखापत होऊन मोठा अनर्थ टळला.

याबाबत अधिक माहिती अशी, गुरुवारी (ता. ३१) सकाळी बेळगावहून पाच्छापूरला कर्नाटक राज्य परिवहन मंडळाची बस (केए 42 एफ 1381) निघाली होती. बस्सापूरजवळ आल्यानंतर चालकाचे बसवरील नियंत्रण सुटले. यावेळी ही बस रस्त्याच्या कडेला उलटल्याने अपघात झाला. सुदैवानेच या घटनेत मोठी जिवीत हानी टळली. केवळ पाच प्रवाशांना किरकोळ दुखापत झाली आहे. त्यात कावेरी आडव्याप्पा गाणगी, कलगौडा शंकर पाटील, गौरव्वा सत्यप्पा ओबन्नावर, मल्लिकार्जुन मल्लाप्पा गजपती व अश्विनी रामाप्पा चौगुला यांचा समावेश आहे.

त्यांना उपचारांसाठी बेळगावच्या बिम्स जिल्हा इस्पितळात पाठवून देण्यात आले. पाच्छापूरचे सहाय्यक पोलिस उपनिरीक्षक मुरगोड व सहका-यांनी घटनास्थळी भेट देऊन पाहणी केली. यमकनमर्डी पोलिस या अपघाताबाबत अधिक तपास करीत आहेत.