उंडवडी - जनाई शिरसाई उपसा सिंचन योजनेतून लाभार्थी दुष्काळी भागाला पाणी सोडण्यात यावे, या मागणीसाठी आजपासून (31) लाभार्थी शेतकऱ्यांनी उंडवडी कडेपठार (बारामती) येथे उपोषण व भजन आंदोलन सुरु केले आहे. 

बारामतीच्या जिरायती भागात यंदा पाऊस नसल्याने मोठ्या प्रमाणावर पाणी व चारा टंचाई निर्माण झाली आहे. टंचाईच्या पार्श्वभूमीवर या भागाला वरदान ठरत असलेल्या जनाई शिरसाई उपसा सिंचन योजनेतून 

पाणी सोडून आवर्तन द्यावे. या मागणीसाठी योजनेतील लाभार्थी शेतकऱ्यांनी उंडवडी कडेपठार ( ता. बारामती) येथील बारामती - पाटस वरील बस स्थानकाजवळ उपोषण व टाळ, मृदूंग वाजवून भजन सुरु केले आहे. जो पर्यंत योजनेतून पाणी सोडले जात नाही. तो पर्यंत वेगवेगळ्या पद्धतीने आंदोलन सुरु ठेवण्याचा निर्धार शेतकऱ्यांनी केला आहे. योजनेतील लाभार्थी शेतकऱ्यांनी गेल्या आठवड्यात कृष्णा खोरे विकास महामंडळाच्या कार्यकारी संचालकाकडे निवेदन देवून 28 जानेवारी पर्यंत पाणी न सोडल्यास आंदोलन करण्याचा इशारा दिला होता. 

त्यानुसार आज उंडवडी कडेपठार, उंडवडी सुपे, जराडवाडी, सोनवडी सुपे, खराडेवाडी, जळगाव सुपे, कारखेल, देऊळगाव रसाळ, अंजनगाव, गोजुबावी, बऱ्हाणपूर आदी गावातील सरपंच, उपसरपंच आदींसह शेतकरी आंदोलनात सहभागी झाले आहेत. 

याबाबत उंडवडी कडेपठारचे माजी सरपंच विठ्ठल जराड व उंडवडी सुपे उपसरपंच पोपट गवळी म्हणाले, "जो पर्यंत आमच्या हक्काचे योजनेचे पाणी सोडले जात नाही, तो पर्यंत आंदोलन सुरुच ठेवणार आहोत. उपोषण चक्री असणार आहे. तसेच दररोज वेगवेगळ्या पद्धतीने आंदोलन सुरु ठेवणार आहे. "