कडेगाव - येथील पोलीस निरीक्षक विपीन हसबनीस यांनी आवाहन केले अन् होळीच्या दुसऱ्या दिवशी लोकांना राखेचे गोळे मारणे व पैसे मागण्याची शहरांतील अनिष्ठ प्रथा बंद झाली. तर होळीच्या निमित्ताने श्री. हसबनीस यांचे प्रयत्नामुळे या अनिष्ठ प्रथेचे 'दहन' झाल्याने त्यांचे शहरांत सर्वत्र कौतुक होत आहे.

होळीच्या दुसऱ्या दिवशी नागरिकांना होळीच्या राखेचे गोळे मारणे, वाहने अडवून पैसे मागणे अशा घटना घडत असत. यातून दरवर्षी वादाचे व मारामारीचे प्रकार घडत होते. तसेच मुलांमध्ये चुकीचे संस्कार रुजण्याचा धोका निर्माण झाला होता. दरवर्षी प्रमाणे आज होळीच्या दुसऱ्या दिवशी शहरात काही तरुण मुलांकडून राखेचे गोळे लोकांना मारणे व वाहनधारकांना अडवून त्यांचेकडून पैसे काढणे असा प्रकार सकाळी आठच्या सुमारास सुरु होता. 

कडेगाव पोलीस ठाण्याचे पोलीस निरीक्षक हसबनीस यांना हा चुकीचे प्रकार लक्षात आला. त्यानंतर त्यांनी शहरांतील सर्व तरुणांना असा प्रकार करु नये, असे आवाहन केले. या प्रकार रोखण्यासाठी प्रत्येक चौका - चौकात पोलीस बंदोबस्त लावला. त्यामुळे गेल्या अनेक वर्षांपासून सुरु असलेला हा चुकीचा प्रकार बंद झाला.

शहरातील तरुणांकडून होळीच्या दुसऱ्या दिवशी राखेचे गोळे करुन ते लोकांना मारणे व पैसे घेणे असे प्रकार घडत असत. गेल्या अनेक वर्षापासून सुरु असलेल्या या अनिष्ठ प्रथेमुळे अनेकवेळा भांडणे व मारामारीचे प्रकार घडत. परंतु पोलिसांनी आता ही अनिष्ठ प्रथा बंद करुन चांगला पायंडा पाडला आहे.
- माणिकराव देशमुख, सामाजिक कार्यकर्ते कडेगाव