सोलापूर : फेसबूक खाते उघडून पाहत असताना त्यावर बुलेट विक्रीची पोस्ट पाहिली. 70 हजार रुपयांत बुलेट मिळणार म्हटल्यावर शिवराज हणमंत कोटगी (रा. ओम गर्जना चौक) यांनी त्या व्यक्‍तीशी संपर्क केला. आर्मीत नोकरीला असल्याचे सांगून शिवराज यांना संशयित आरोपीने बनावट कागदपत्रे पाठविली. त्यावर विश्‍वास ठेवून शिवराज यांनी एक लाख 39 हजार 200 रुपये दिले. मात्र, संशयित आरोपीने बुलेट दिली नसल्याने शिवराज कोटगी यांनी विजापूर नाका पोलिस ठाणे गाठले. 

हेही वाचा : साखरेचा उतारा का आला नऊ टक्‍क्‍यांच्या खाली? 

गुगल पे वरील गणेशलाल घमेटी बी 8696195746, 8696138691 व 8094815894 या क्रमांकाचा वापर करणाऱ्या युवकाने फसवणूक केल्याची फिर्याद शिवराज कोटगी यांनी दिली आहे. बुलेटची किंमत (एमएच 13, सीआर 0130) 70 हजार रुपये असल्याची पोस्ट फेसबुकवर टाकली होती. मात्र, हा व्यवहार 65 हजाराला ठरला. संशयित आरोपीच्या फेसबूक डिपीवर इंडियन आर्मीचा लोगो होता. आरोपीशी संपर्क झाल्यावर त्याने सांगितले, मी पुणे येथे कमांडो म्हणून नोकरीस होतो आणि आता माझी बदली नागपूरला झाली आहे. मी मूळचा गोंदियाचा असून आता माझी परिस्थिती खराब असल्याने सोलापुरात राहायला येणार आहे. त्याच्यावर विश्‍वास ठेवून पैसे ट्रान्सफर केले. मात्र, आरोपीने बुटेल दिलीच नाही, असेही फिर्यादीत नमूद करण्यात आले आहे. 

हेही वाचा : सोलापूरच्या हातमागावरील बोधचिन्ह झळकणार या देशात 

व्हॉटस्‌ऍपवर साधला संपर्क 
बुलेटचा मूळ मालक रुद्रमुणी हिरेम्मा यांच्या नावाचा वापर करुन संशयित आरोपीने आरसी बूक, भारत सरकारच्या सीआयएसएफचे ओळखपत्र बनावट तयार केले. त्यावर युनिफॉर्म घातलेला फोटो होता. आधार कार्डही बनावटच तयार केले. कागदपत्रे पाहून शिवराज कोटगी यांनी समोरील व्यक्‍तीला रक्‍कम दिली. मात्र, त्याने सर्व संपर्क व्हॉटस्‌ऍपवरुनच केला. या प्रकरणाचा पुढील तपास आता सहायक पोलिस निरीक्षक शेटे करीत आहेत.