सोलापूर : माजी मुख्यमंत्री आणि काँग्रेसचे ज्येष्ठ नेते सुशीलकुमार शिंदे यांची कन्या आमदार प्रणिती शिंदे पुन्हा अडचणीत आल्या आहेत. त्यांनी मतदारांना त्यांचा फोटो असलेला मेकअप बॉक्स देऊन आचारसंहितेचा भंग केल्याची तक्रार माजी आमदार आणि माकप नेते आडम मास्तर यांनी दिली आहे. 

केंद्रीय निवडणूक आयोगाने विधानसभा निवडणुकांच्या तारखांची घोषणा आज (शनिवार) केली. त्यानंतर राज्यात दुपारी आज दुपारी साडेबारा वाजता आचारसंहिता लागू झाली. मात्र, त्यानंतर प्रणिती शिंदे यांनी मतदारांना मेकअप बॉक्स देऊन आचारसंहिता भंग केला, अशी तक्रार आडम मास्तर यांनी जिल्हाधिकारी डॉ. राजेंद्र भोसले यांच्याकडे केली. पाच वर्षांत काम न केल्यानेच प्रणिती शिंदे यांना मतदारांना आकर्षित करावे लागत आहे, अशी टीकाही आडम मास्तरांनी यावेळी केली.

दरम्यान, या प्रकरणाची चौकशी करून कारवाई केली जाईल, असे आश्वासन जिल्हाधिकारी भोसले यांनी दिले आहे.

आडम मास्तर यांची स्टंटबाजी : प्रणिती शिंदे

आडम मास्तर निव्वळ स्टंटबाजी करत आहेत. ते महिलांचा अपमान करत आहेत, अशा शब्दांत प्रणिती शिंदे यांनी आडम मास्तर यांच्यावर टीका केली.