सांगली : कोराना साथीच्या पार्श्‍वभूमिवर सांगली जिल्ह्यात आजपासून कोणताही कार्यक्रम, समारंभाच्या उपस्थितीसह अनेक निर्बंध जिल्हाधिकारी डॉ. अभिजित चौधरी यांनी लागू केले आहेत. राज्य शासनाकडून यापूर्वी कोरोनाच्या सुधारीत आदेशान्वये मार्गदर्शक सूचना जाहीर केल्या आहेत. जिल्हादंडाधिकारी डॉ. चौधरी यांनी कोरोना फैलाव प्रतिबंधासाठी तात्काळ लागू केले आहेत.

दुकान, आस्थापना, मॉल, समारंभ, संमेलन (मेळावे), इत्यादी ठिकाणी, संपूर्ण लसीकरण झालेल्या व्यक्तींद्वारे व्यवस्थापन केले पाहिजे. आणि अशा ठिकाणी येणारे सर्व अभ्यागत, ग्राहक यांचे संपूर्ण लसीकरण झालेले असावे. सर्व सार्वजनिक परिवहन सेवांमध्ये, संपूर्ण लसीकरण झालेल्या व्यक्तींनाच परवानगी असेल. कोणताही कार्यक्रम, समारंभ, इत्यादींमधील उपस्थितीवरील क्षमतेच्या ५० टक्के निर्बंध असतील. त्यात चित्रपट गृह, नाट्यगृह, मंगलकार्यालय, बंदिस्त जागेत घेण्यात येणाऱ्या कोणत्याही कार्यक्रमाचा समावेश असेल. संपूर्ण खुल्या असलेल्या समारंभांसाठी जागेच्या क्षमतेच्या 25 टक्के लोकांना परवानगी दिली जाईल.

मेळाव्यासाठी लोकांची संख्या 1 हजारांपेक्षा अधिक असेल तर अशा बाबतीत स्थानिक आपत्ती व्यवस्थापन प्राधिकरणाला त्याची माहिती द्यावी लागेल. जिल्हा आपत्ती व्यवस्थापन प्राधिकरणाचे इतर वाजवी निर्बंध कोणत्याही जिल्हा आपत्ती व्यवस्थापन प्राधिकरणास जर योग्य वाटल्यास कोणत्याही क्षणी त्यांच्या संबंधित अधिकारक्षेत्रासाठी, यात नमूद केलेले निर्बंध व शर्ती वाढविता येतील. परंतु कमी करता येऊ शकणार नाहीत. मात्र, जाहीर नोटीसद्वारे 48 तासांची पूर्व सूचना दिल्याशिवाय तसे करता येणार नाही. याशिवाय लसीकरण, मास्क, सामाजिक अंतर, सॅनिटायझर वापर, गर्दी टाळण्याचे आवाहन केले आहे.