सांगली : शालेय शिक्षणापासून असलेल्या ओळखीचा आणि परिस्थितीचा फायदा घेऊन लग्नाचे (Married) आमिष दाखवून युवतीवर बलात्कार केल्याची घटना समोर आली आहे. याप्रकरणी पोलिसांनी (Sangli Police) संशयित शाहिद इकबाल मुजावर (वय १९, रा. सम्राट व्यायाम मंडळाजवळ, सांगली) याला ताब्यात घेतले आहे. त्याला न्यायालयासमोर हजर केले असता तीन दिवसांची पोलिस कोठडी सुनावण्यात आली आहे.

दरम्यान, त्याच्याविरुद्ध लैंगिक अत्याचारासह अनुसूचित जाती व जमाती अत्याचार प्रतिबंध (Atrocity) अधिनियमातील तरतुदीनुसार गुन्हा दाखल करण्यात आला आहे. पोलिसांनी दिलेली माहिती अशी की, पीडित युवती आणि संशयित शाहिद मुजावर शालेय जीवनापासून एकमेकांना ओळखतात. पीडितेच्या परिस्थितीचा फायदा घेऊन संशयिताने तिच्याशी अधिक जवळीक केली. तिला लग्नाचे आमिष दाखवून लॉज आणि कॅफे शॉपमध्ये येण्यास भाग पाडून तिच्याशी शरीरसंबंध ठेवले.

पीडितेने त्याच्याकडे लग्नाचा तगादा लावल्याने शाहिद मुजावर याने तिला सोमवारी (ता. ७) शहरातील एका लॉजमध्ये बोलावून घेतले. त्या ठिकाणीही त्याने जबरदस्तीने तिच्याशी शरीरसंबंध ठेवले. या घटनेनंतर पीडित युवतीने संशयित शाहिद मुजावर याच्याविरुद्ध फिर्याद दिली. पोलिसांनी त्याला ताब्यात घेऊन अटकेची कारवाई केली. पोलिस उपाधीक्षक विमला एम. अधिक तपास करत आहेत.

'कॅफे'पासून सुरुवात

काही महिन्यांपूर्वी सांगलीतील एका कॅफेमध्ये एका युवतीवर गुंगीचे औषध देऊन अत्याचार करण्यात आला होता. त्यामुळे संतप्त झालेल्या शिवप्रतिष्ठान युवा हिंदुस्थान संघटनेच्या कार्यकर्त्यांनी तीन ‘कॅफें’ची तोडफोड केली होती. त्यानंतर खडबडून जागे झालेल्या जिल्हा प्रशासनाने कॅफेसंबंधी निर्बंध लागू केले; परंतु आजही असे कॅफे सुरू आहे. या घटनेची सुरुवातही कॉलेज कॉर्नर येथील एका कॅफेतूनच झाल्याचे तक्रारीत नमूद आहे. त्यामुळे पोलिस आता या कॅफेंच्या मुळावर घाव घालणार का, असा सवाल उपस्थित होतो आहे.