कोल्हापूर - अनपेक्षितपणे उमेदवारांची वाढलेली संख्या व  नियोजनाचा अभाव यामुळे आज सैन्य भरतीसाठी आलेल्या हजारो युवकांना नाहक त्रास सहन करावा लागला. संतप्त उमेदवारांनी सैन्य भरती झालीच पाहिजे, शिवाजी महाराज की जय अशी घोषणाबाजी करत मराठा लाईट इंफॅन्ट्री बटालियांच्या दारात जवळपास तीन तास ठिय्या मांडला.

परिस्थिती नियंत्रणा बाहेर जात असल्यासाचे लक्षात येताच पोलिस पथक व दंगलकाबू पथक घटनास्थळी दाखल करण्यात आले. या पथकांमुळे या परिसराला छावणीचे स्वरूप आले होते. सुरु असलेला गोंधळ लक्षात घेऊन अप्पर पोलीस अधीक्षक तिरुपती काकडे यांनी भरती सुरु असलेल्या ठिकाणी जाऊन संबंधीत अधिकाऱ्यांशी चर्चा केली. त्यांनी तीन दिवस ही भरती प्रक्रिया सुरू राहणार असल्याचे सांगितले. अप्पर पोलिस अधीक्षक काकडे व पोलिस निरिक्षक शशीराज पाटोळे यांनी बाहेर येऊन सैन्य भरतीसाठी आलेल्या उमेदवारांना तशी माहिती देत संयम राखण्याचे आवाहन केले. तसेच उद्या पहाटे पुन्हा भरतीसाठी उमेदवारांना प्रवेश दिला जाणार असल्याचे सांगितले. यानंतर उमेदवारांनी आंदोलन मागे घेतले.