बेळगाव : बेळगाव शहरातील पदवी, अभियांत्रकी व पॉलिटेक्‍निक महाविद्यालयातील प्राध्यापक व शिक्षकेतर कर्मचारी तसेच विद्यार्थ्यांची कोरोना चाचणी पूर्ण झाली आहे. महाविद्यालयातील प्राध्यापक व शिक्षकेतर कर्मचारी मिळून सुमारे २,८०० जणांची कोरोना चाचणी झाली. त्यात केवळ ८ जणांचा अहवाल पॉझिटिव्ह आला आहे. तर सुमारे ६,८०० विद्यार्थ्यांची कोरोना चाचणी करण्यात आली असून त्यात १५ जणांचा अहवाल पॉझिटिव्ह आला आहे.

विद्यार्थ्यांची आरोग्य तपासणी आज पूर्ण झाली आहे. प्राध्यापक, शिक्षक, शिक्षकेतर कर्मचारी व विद्यार्थी मिळून केवळ २३ जण बाधित आढळले. त्यामुळे संसर्गाचे प्रमाण अत्यंत कमी असल्याचा निष्कर्ष आरोग्य विभागाने काढला आहे. १७ नोव्हेंबरपासून पदवी महाविद्यालये सुरू करण्यात आली. तेथील प्राध्यापक व शिक्षकेतर कर्मचाऱ्यांची कोरोना चाचणीही त्याच दिवशी सुरू करण्यात आली. चार दिवसांच्या या मोहिमेत आरोग्य विभागाच्या पथकाने महाविद्यालयात जाऊन स्वॅब घेतला. 

हेही वाचा - बनावट नोट पन्नासची अन् गाठ पडली पोलीसांशी
 

पहिल्याच दिवशी सहा जणांचा अहवाल पॉझिटिव्ह आला. मात्र त्यानंतरच्या टप्प्यात केवळ दोघांचाच अहवाल पॉझिटिव्ह आला. चार दिवसांनंतर आरोग्य विभागाने विद्यार्थ्यांचा स्वॅबही जमा केला. दोन आठवडे चाललेली ही मोहीम शनिवारी पूर्ण झाली. त्यात केवळ १५ विद्यार्थ्यांचा अहवाल पॉझिटिव्ह आल्याने सर्वांनीच सुटकेचा निःश्‍वास सोडला आहे.

महाविद्यालये सुरू केल्यानंतर प्राध्यापक व विद्यार्थ्यांच्या कोरोना चाचणीचा अहवाल, महाविद्यालयांमधील विद्यार्थ्यांची उपस्थिती पाहून शाळा सुरू करण्याचा निर्णय घेण्यात येणार होता, पण दिवाळीनंतर बंगळूरसह देशातील अनेक शहरांत बाधितांची संख्या वाढली. त्यामुळे शाळा डिसेंबर अखेरपर्यंत बंद ठेवण्याचा निर्णय शासनाने घेतला आहे.

हेही वाचा - महापरिनिर्वाण दिन : पित्याच्या आठवणीने गहिवरत बाबासाहेब -

संसर्गाचे प्रमाण नगण्यच

महाविद्यालयात प्रवेशासाठी कोरोना चाचणी अहवाल सक्तीचा आहे. त्यामुळे काही विद्यार्थ्यांनी बिम्स येथे जाऊन कोरोना चाचणी करून घेतली. चाचणीसाठी तेथे गर्दीही होते. मात्र, एकंदर कोरोना संसर्गाचे प्रमाण खूपच कमी आहे. ‘बिम्स’मध्ये तपासणी करून घेतलेल्या विद्यार्थ्यांमध्येही कोरोना संसर्ग कमी असल्याची माहिती मिळाली.

संपादन - स्नेहल कदम