नगर : जिल्ह्यात न्यूमोनिया, सर्दी, खोकला, घशात खवखव, धाप लागणारे रुग्ण आढळून येत असल्याने प्रशासनाने सावध भूमिका घेतली आहे. अशा रुग्णांसाठी तालुकास्तरावर वेळीच निदान व्हावे, यासाठी कोविड केअर सेंटर (सीसीसी) कार्यान्वित करण्यात आले आहे. त्यामुळे अशी लक्षणे दिसताच नागरिकांचे स्वॅब घेतले जातील. त्यानंतर तपासणीसाठी पाठविले जातील. या सर्व घडामोडींवर जिल्हा प्रशासनाचे लक्ष राहणार आहे. 

हेही वाचा - नगरकरांमागे नवंच दुखणं, कोरोनापाठोपाठ आली सारी

कोरोना रुग्णांच्या शोधाबरोबरच आता "सारी'च्या रुग्णांचेही तत्काळ निदान व्हावे, यासाठी यंत्रणेने तयारी केली आहे. जिल्हाधिकारी राहुल द्विवेदी यांनी नुकतीच या संदर्भात सर्व उपविभागीय अधिकारी, तहसीलदार, गटविकास अधिकारी, तालुका आरोग्य अधिकारी यांच्याशी व्हिडिओ कॉन्फरन्सद्वारे संवाद साधून आढावा घेतला. 

धाप असो की खोकला; सर्वेक्षण होणार 
केंद्र व राज्य शासनाने, ज्यांना श्वसनविकाराचा तीव्र त्रास होत आहे, अशा नागरिकांचे सर्वेक्षण करण्याबाबत निर्देश दिले आहेत. त्यानुसार पाच वर्षांवरील सर्व व्यक्तींना अचानक सुरू झालेला 38 अंश सेल्सिअस ताप असेल, खोकला, घशात खवखव जाणवत असेल, धाप लागणे, श्‍वास घेण्यास त्रास होणे, अशा आणि रुग्णालयात भरती करण्याची आवश्‍यकता असणाऱ्या व्यक्तींना रुग्ण म्हणून ओळखले जाते. जिल्ह्यात अशा रुग्णांची नोंद करण्यासाठी जिल्हा आरोग्य यंत्रणेला आदेश दिले होते. त्यानुसार गाव आणि तालुकानिहाय अशा रुग्णांचा शोध घेतला जात आहे.

नागरिकांनीही अशा रुग्णांची माहिती जवळच्या आरोग्य यंत्रणेला द्यावी, जेणे करून संबंधित रुग्णांवर वेळेत उपचार करणे शक्‍य होईल, असे आवाहन जिल्हाधिकारी राहुल द्विवेदी यांनी केले आहे.