कोपरगाव- शहरातील लक्ष्मीनगर भागात राहणारी महिला कोरोनाशी झुंज देत असताना अखेर आज पहाटे तिची प्राणज्योत मालवली. ग्रामीण रुग्णालयाचे वैद्यकीय अधीक्षक यांनी  या घटनेस दुजोरा दिला आहे . यानिमित्ताने तालुक्यात कोणाचा पहिला बळी गेला असल्याचे समोर येत आहे.

यापूर्वी श्रीरामपूर तालुक्यातील गोवर्धन येथील एका तरूणाला कोरोनामुळे जीव गमवावा लागला. तो गतिमंद असल्याचे सांगितले जाते. मात्र, आता या महिलेच्या मृत्यूमुळे जिल्ह्यातील लोकांची चिंता वाढली आहे. आतापर्यंत जिल्ह्यात २८जणांना लागण झाली आहे. त्यातील तिघे बरे होऊन घरी गेले आहेत.तर दोन जणांना मृत्यूने गाठले.

गेल्या शुक्रवारी लक्ष्मीनगर भागातील या 60 वर्षीय महिलेला कोरोनाची बाधा झाली असल्याचे आढळून आले होते. त्या आधीच तिला ग्रामीण रुग्णालयात न्यूमोनियाची उपचारासाठी दाखल करण्यात आले होते. कोरोनाची बाधा झाल्याचे आढळून आल्यानंतर सदर महिलेस सुरुवातीस नगर येथील बूथ हॉस्पिटल व त्यानंतर सिव्हिल हॉस्पिटलमध्ये उपचार घेत होती.

सदर महिलेच्या संपर्कात असलेले 13 जणांचे अहवालही निगेटिव्ह आले होते. मात्र, सदर महिलेची आज सकाळी प्राणज्योत मालवली. त्या महिलेची झुंज थांबल्याने कोपरगावकरांची चिंता मात्र वाढली. शासकीय स्तरावर सर्व अधिकारी कर्मचारी शहर व तालुक्याची काळजी घेत असताना नागरिक मात्र अजूनही गाफील असल्याचे दिसून येत आहे. मात्र कोपरगावकरांनी काळजी घेणे आवश्यक आहे.