मिरज (सांगली) : तालुक्‍यातील करोली (एम) येथे किरकोळ कारणावरून दारूच्या नशेत दोघा भावांमध्ये झालेल्या वादाचे पर्यवसान खुनामध्ये  झाले. यामध्ये लहान भावाने मोठ्या भावाचा खून केला. मनोज वसंत इंगवले-देशमुख (वय ४२) असे खून झालेल्या व्यक्तीचे नाव आहे, तर नितीन वसंत इंगवले-देशमुख असे संशयिताचे नाव आहे. पोलिसांनी संशयित नितीन वसंत इंगवले-देशमुख याला रात्री उशिरा अटक केली. याबाबत मिरज ग्रामीण पोलिस ठाण्यात नोंद झाली आहे.

हेही वाचा - खाईल त्याला खवखवे म्हण राज्य सरकारला लागू होते 
 

या घटनेबाबत पोलिसांनी दिलेली माहिती अशी, मनोज वसंत इंगवले-देशमुख आणि नितीन वसंत इंगवले-देशमुख हे दोघेही सख्खे भाऊ आहेत. या दोघांना वडिलांनी त्यांची वडिलोपार्जित तीन एकर शेतजमीन प्रत्येकी दीड एकरप्रमाणे दिली आहे. यापैकी मोठा भाऊ मनोज वसंत इंगवले-देशमुख यांच्या वाटणीच्या शेतात द्राक्षबाग आहे. या बागेत मंगऴवारी (१६) रोजी सांयकाळी शेतमजूर कामाला आले. यावेळी लहान भाऊ नितीन वसंत इंगवले-देशमुख याने दारूच्या नशेत या शेतमजुरांना शिवीगाळ केली. ही शिवीगाळ आणि अंगावर धाऊन जाण्याचे प्रकार आठ वाजल्यापासून सुरू होते. या दोघांच्याही पत्नी सख्या बहिणी आहेत. या दोघींनी हे वाद मिटवले; पण धाकटा भाऊ नितीन वसंत इंगवले-देशमुख हा रात्री दहा वाजता पुन्हा दारू पिऊन आला. त्याने थोरला भाऊ मनोज वसंत इंगवले-देशमुख याच्याशी पुन्हा भांडण काढले आणि त्याला जोरदार मारहाण केली आणि घरातील लोखंडी सळी आणि लोखंडी पारीने मनोजच्या डोक्‍यात जोरदार वार केले. या हल्ल्यात मनोज वसंत इंगवले-देशमुख हे जागीच ठार झाले. यावेळी घरातील महिला आणि मुलांनी आरडाओरड केल्यानंतर शेजारच्या ग्रामस्थांनी याची माहिती मिरज ग्रामीण पोलिसांना दिली. पोलिसांनी घटनास्थळी येऊन संशयित हल्लेखोर नितीन वसंत इंगवले-देशमुख याला ताब्यात घेतले.