कुपवाड : बामणोली-कुपवाड रस्त्यावर रविवारी रात्री धारधार शस्त्राने अज्ञातांनी केलेल्या हल्ल्यात युवकाचा मृत्यू झाला. अमर ऊर्फ गुट्ट्या राजेंद्र जाधव (वय २७, रा. सुवार्ता टॉकीज जवळ कुपवाड ता. मिरज) असे त्याचे नाव आहे. हल्लाप्रकरणी संशयितांविरोधात कुपवाड पोलिसांत गुन्हा दाखल केला. हल्लेखोरांचा शोध घेण्यासाठी कुपवाड पोलिसांनी तत्काळ शोधपथके रवाना केली.

पोलिसांनी दिलेल्या व घटनास्थळाहून मिळालेल्या माहितीनुसार, मृत अमर जाधव यांचा कुपवाड शहरात चायनीजचा व्यवसाय आहे. रविवारी रात्री नऊच्या सुमारास ते बामणोली रस्त्यावरून निघाले असता. हल्लेखोरांनी दुचाकीवरून त्यांचा पाठलाग केला. बामणोलीच्या कमानीजवळ धारधार शस्त्रांनी जाधव यांच्यावर प्राणघातक हल्ला चढविला.

हल्ल्यात जाधव गंभीर जखमी झाले. ते जमिनीवर कोसळताच हल्लेखोरांनी घटनास्थळावरून पोबारा केला. माहिती मिळताच कुपवाड पोलिसांनी धाव घेतली. जखमी जाधव यांना आयुष हेल्पलाईन रेस्क्यू टीमच्या मदतीने मिरज येथील शासकीय रुग्णालयात दाखल केले. वैद्यकीय तपासणीमध्ये त्यांना डॉक्टरांनी मृत घोषित केले.

बामणोली रस्त्यावर बघ्यांची गर्दी जमली. जमिनीवर जाधव यांच्या ताब्यातील दुचाकी (एमएच १० डीम ४१२७) आणि एक धारधार हत्यार पोलिसांनी पंचनाम्यादरम्यान जप्त केले. पोलिस उपअधीक्षक अजित टिके यांनी घटनास्थळी भेट देऊन पाहणी केली. कुपवाड ठाण्याचे सहाय्यक पोलिस निरीक्षक अविनाश पाटील यांच्या मार्गदर्शनाखाली संशयितांचा शोध घेण्यासाठी तातडीने पथके रवाना करण्यात आली.

मृत जाधव रेकॉर्डवरील गुन्हेगार

खुनातील मृत जाधव हद्दपार गुन्हेगार असल्याची माहिती कुपवाड पोलिसांनी दिली. त्यास कोल्हापूर व सांगली जिल्ह्यातून एक वर्षासाठी हद्दपार केले होते. रविवारी शहरात आल्यानंतर पूर्वी झालेल्या वादातून त्याचा खून करण्यात आला असा संशय व्यक्त होत आहे.