श्रीरामपूर : "रुग्णाच्या मृत्यूस तुम्हीच कारणीभूत आहात,' असे सांगून येथील शल्यचिकित्सक डॉ. संजय अनारसे यांना 10 लाख रुपयांची खंडणी मागितल्याप्रकरणी शहर पोलिसांनी महिलेसह तिघांविरुद्ध गुन्हा नोंदविला. समीर माळवे, रमेश गायकवाड व माधवी गायकवाड (सर्व रा. श्रीरामपूर), अशी आरोपींची नावे आहेत. 

पोलिसांच्या माहितीनुसार, पोटात दुखत असल्याने येथील ऊर्मिला रमेश गायकवाड यांना 21 ऑक्‍टोबर रोजी डॉ. अनारसे यांच्या रुग्णालयात दाखल करण्यात आले. "एक्‍स-रे'मध्ये त्यांच्या पोटात गोळा आढळून आला. नातेवाइकांच्या इच्छेनुसार डॉक्‍टरांनी शस्त्रक्रिया केली. नंतर ऊर्मिला यांना पुढील उपचारासाठी संजीवन हॉस्पिटलमध्ये दाखल करण्यात आले. तेथे प्रकृती न सुधारल्याने नगरला हलविले. मात्र, तेथेही प्रकृती खालावल्याने त्यांना पुन्हा संजीवन हॉस्पिटलमध्ये आणले. उपचारादरम्यान 27 ऑक्‍टोबर रोजी त्यांचा मृत्यू झाला. 

हेही वाचा ः विषबाधा झाल्याने दोन मुलांचा मृत्यू

डॉ. अनारसे यांच्या हलगर्जीपणामुळे ऊर्मिला यांचा मृत्यू झाल्याबाबत पोलिसात तक्रार दाखल न करण्यासाठी, तसेच रुग्णालयाची बदनामी टाळण्यासाठी वरील आरोपींनी डॉ. अनारसे यांच्याकडे 10 लाख रुपयांची मागणी केली. पैसे न दिल्यास जिवे मारण्याची, तसेच "ऍट्रॉसिटी'चा गुन्हा नोंदविण्याची धमकी आरोपींनी दिली. त्यांच्या सततच्या त्रासाला कंटाळून डॉ. संजय शंकर अनारसे यांनी आज शहर पोलिस ठाण्यात फिर्याद दिली. त्यानुसार पोलिसांनी गुन्हा दाखल केला. या प्रकरणी उशिरापर्यंत कोणालाही अटक झाली नव्हती. 

हेही वाचा ःतलाठ्यावर खुनी हल्ला 

मुलीस फूस लावल्याच्या गुन्ह्यात 
आरोपीला सक्तमजुरी 

नगर: अल्पवयीन मुलीला फूस लावून पळवून नेल्याच्या गुन्ह्यात श्रीगोंदे येथील जिल्हा सत्र न्यायालयाने आरोपीला तीन वर्षे सक्तमजुरी व पाच हजारांचा दंड केला. 
बंडू ऊर्फ प्रकाश पोपट चौधरी (रा. शिंदे, ता. कर्जत), असे आरोपीचे नाव आहे. 
अधिक माहिती अशी ः पीडित मुलगी 19 ऑक्‍टोबर 2016 रोजी परीक्षेला जात असताना आरोपी प्रकाश चौधरी याने दुचाकी अडविली आणि हात धरला. आई-वडिलांना जिवे मारण्याची धमकी देऊन तिला बळजबरीने दुचाकीवर बसवून पलसाणा (गुजरात) येथे नेले, अशी फिर्याद पीडितेच्या वडिलांनी कर्जत पोलिस ठाण्यात दिली. 
पोलिसांनी तपास करून दोषारोपपत्र न्यायालयात सादर केले. खटल्याची सुनावणी श्रीगोंदे येथील जिल्हा सत्र न्यायालयात झाली. खटल्यात सरकार पक्षातर्फे आठ साक्षीदार तपासण्यात आले. सरकार पक्षाचा पुरावा आणि युक्तिवाद ग्राह्य धरून न्यायालयाने आरोपीला दोषी धरीत वरीलप्रमाणे शिक्षा केली. सरकार पक्षातर्फे सहायक सरकारी अभियोक्ता ऍड. मोहन कुलकर्णी यांनी बाजू मांडली.