कोपरगाव ः शिर्डीकडे जात असलेल्या दिंडीत हातातील झेंड्याला विजेच्या तारेचा स्पर्श होऊन, उतरलेल्या विजेच्या धक्‍क्‍याने तरुणाचा जागीच मृत्यू झाला. तालुक्‍यातील टाकळी येथे हा अपघात झाला. अमोल भगवान कोंढरे (वय 21, रा. वाकद शिरवाडे, ता. निफाड, जि. नाशिक) असे त्याचे नाव असून, पोलिसांनी अकस्मात मृत्यूची नोंद केली आहे. 

हे वाचा सत्तेचा ताळमेळ अन्‌ नगरची भेळ 

नववर्षानिमित्त वाकद शिरवाडे येथून शिर्डीकडे जात असलेली दिंडी टाकळी येथे एका भक्ताच्या घरी थांबली होती. रात्री साडेदहापर्यंत सर्व साईभक्तांनी जेवण घेतले. साईभक्तांची मुक्कामाची व्यवस्था मराठी शाळेत होती. सर्व जण रात्री अकराच्या सुमारास मुक्कामाच्या स्थळी निघाले, त्या वेळी अमोलच्या हातात झेंडा होता. टाकळी शाळेजवळ रस्ता ओलांडत असताना त्याच्या हातातील झेंड्याचा वीजवाहिनीला स्पर्श झाला. त्यात वीजप्रवाह उतरल्याने विजेचा जोराचा धक्का लागून अमोलचा जागीच मृत्यू झाला. कोपरगाव ग्रामीण रुग्णालयात त्याच्या पार्थिवाची उत्तरीय तपासणी करण्यात आली. 

हे पाहा अखेर जिल्हा परिषदेचे कारभारी बिनविरोध 

दिंडीचालकांनी मात्र प्रसारमाध्यमांशी बोलताना, वीज वितरण कंपनीच्या हलगर्जीपणामुळे अमोलचा मृत्यू झाल्याचा आरोप केला. गेल्या दहा वर्षांपासून आम्ही शिर्डीकडे जात असतो; मात्र असा अपघात कधी झाला नाही, असे दिंडीतील साईभक्त सांगत होते. 

हे पाहा तोटा सहन करूनही "ति'ची सेवा सुरूच