चिक्कोडी - चिक्कोडी शहरातील आर. डी. महाविद्यालयाला बेळगाव जिल्हा पोलिस प्रमुख लक्ष्मण निंबरगी यांनी भेट देऊन विधानपरिषद निवडणूक मतमोजणी केंद्राच्या स्ट्रॉंगरूमसह सुरक्षेची पाहणी केली. त्यांनी पोलिस निरीक्षक, अधिकारयांना काटेकोरपणे लक्ष देऊन इतर कोणालाही आत प्रवेश देऊ नये, त्यासाठी स्वतः जबाबदारीने लक्ष घालून गाफील न राहता कडक पहारा देण्याची सूचना केली.

विधान परिषदेची निवडणूक 10 नोव्हेंबरला झाली असून मंगळवारी (ता. 14) मतमोजणी होऊन निकाल जाहीर होणार आहे. या निवडणुकीची मतमोजणी येथील आर. डी. महाविद्यालयात केली जाणार आहे. त्यामुळे जिल्ह्यातील सर्व मतपेट्या या महाविद्यालयातील विशेष स्ट्रॉंग रूममध्ये आणून ठेवल्या आहेत. परिणामी या ठिकाणी कोणत्याही अनुचित प्रकाराची घटना घडू नये, यासाठी महाविद्यालयाच्या आजूबाजूला कडक पोलिस बंदोबस्त ठेवला आहे. रविवारी (ता.12) जिल्हा पोलिस प्रमुख लक्ष्मण निंबरगी यांनी निरीक्षण करून सर्व ठिकाणी भेट देऊन पाहणी केली. यावेळी अतिरिक्त जिल्हा पोलिस प्रमुख अमरनाथ रेड्डी, चिक्कोडीचे पोलिस उपाधीक्षक मनोजकुमार नाईक, मंडल पोलिस निरीक्षक आर. आर. पाटील यांच्यासह अधिकारी उपस्थित होते.