पलूस : शहरात तासगाव-कऱ्हाड महामार्गानजीक पालिकेच्या (Palus Municipality) जागेत अनोळखींनी मंगळवारी (ता. ९) रात्री भारतरत्न डॉ. बाबासाहेब आंबेडकर यांचा अर्धपुतळा (Dr. Babasaheb Ambedkar statue) बसवला. तो काढावा, असे प्रशासनाचे मत, तर पुतळा काढू नये, असे अनुयायांचे मत होते. रात्री उशिरापर्यंत तोडगा निघाला नाही.

गर्दी झाल्याने पोलिस बंदोबस्त ठेवण्यात आला होता. सकाळी स्मशानभूमी लगत बगीचात (आय लव्ह पलूसकर पॉईंट) डॉ. आंबेडकर यांचा पुतळा अनोळखींनी बसवला. प्रशासनाने दक्षता म्हणून बंदोबस्त ठेवला. शहरासह तालुक्यातील कार्यकर्ते आले होते. प्रशासनाने चर्चा केली.

तहसीलदार निवास ढाणे, पोलिस उपाधीक्षक सचिन थोरबोले, पलूसच्या मुख्याधिकारी निर्मला राशिनकर, सहायक पोलिस निरीक्षक प्रवीण साळुंखे, युवराज सरनोबत, तसेच ॲड. के. डी. कांबळे, बोधिसत्व माने, सुशील गोतपागर, राजेश गायगवाळे, अविनाश काळेबाग, विजय गावले, राजेश तिरमारे, महादेव होवाळ, विशाल तिरमारे, मिलिंद वाघमारे, अनिल कांबळे व कार्यकर्त्यांची बैठक घेतली. ती निष्फळ ठरली. रात्री पुतळ्याच्या ठिकाणी अनुयायी मोठ्या संख्येने जमले.

डॉ. आंबेडकर यांचा पुतळा उभारण्याची मागणी अनेक दिवसांपासून सुरू आहे. अनोळखींनी उभा केलेला पुतळा काढू नये, अन्यथा आंदोलन करू, असा इशारा देण्यात आला आहे. डॉ. आंबेडकर यांच्या पुतळ्याची पूजा करून पुष्पहार अर्पण करण्यात आला. खबरदारीचा उपाय म्हणून पोलिस बंदोबस्त ठेवण्यात आला आहे. दरम्यान, या प्रकाराबाबत पालिका प्रशासनाने रात्री उशिरापर्यंत पोलिसांत तक्रार दिली नव्हती.