सांगली : महापालिकेच्या रिक्त पदाच्या पोट निवडणुकीसाठी 12 रोजी प्रारुप मतदार यादी प्रसिद्ध होणार आहे. निवडणूक आयोगाने आज ही घोषणा केली. सांगली मिरज कुपवाड शहर महापालिकेतील प्रभाग सोळा मधील एका जागेसाठी पोटनिवडणूक होणार आहे.

राज्य निवडणूक आयोगाने राज्यातील महानगरपालिका मधील रिक्त असलेल्या जागांच्या पोटनिवडणुकीसाठी १२ नोव्हेंबर रोजी प्रारुप मतदार यादी प्रसिद्ध करण्याची घोषणा केली आहे. यामध्ये सांगली-मिरज-कुपवाड महापालिकेसह धुळे, अहमदनगर, नांदेड-वाघाळा, पनवेल आणि मीरा भाईंदर या महापालिकेतील रिक्त जागांचा समावेश आहे.

सांगलीचे माजी महापौर काँग्रेस नेते हारुण शिकलगार यांचे गतवर्षी निधन झाले. महापालिकेच्या प्रभाग १६ मधून ते निवडून आले होते. त्यांच्या निधनानंतर रिक्त झालेल्या जागेवर अद्याप पोटनिवडणूक झाली नाही. ही निवडणूक कोरोनामुळे लांबणीवर पडली होती. त्यामुळे या निवडणुकीकडे महापालिका क्षेत्राचे लक्ष लागले आहे.

राज्यातील कोराची दुसरी लाट ओसरल्यानंतर निवडणुकांची हालचाल आता सुरू झाली आहे. त्यामुळे राज्य निवडणूक आयोगाने महापालिकांमधील रिक्त असलेल्या जागांसाठी पोटनिवडणूक घेण्याच्या हालचालीही सुरू केल्या आहेत. याचाच पहिला टप्पा म्हणून १२ नोव्हेंबर रोजी या रिक्त असलेल्या जागांच्या मतदार संघाची प्रारुप मतदार यादी प्रसिद्ध करण्यात येणार आहे.