सोलापूर : सोलापूरचे पालकमंत्री तथा राज्याचे कामगारमंत्री दिलीप वळसे-पाटील 25 व 26 जानेवारी रोजी सोलापूरच्या दौऱ्यावर येतील अशी प्राथमिक माहिती आहे. 26 जानेवारी रोजी प्रजासत्ताक दिनानिमित्त होणारे झेंडावंदन करून पालकमंत्री वळसे-पाटील त्याच दिवशी दुपारी जिल्ह्याचे नियोजन करणार आहेत. 
पालकमंत्र्यांच्या अध्यक्षतेखाली असलेल्या जिल्हा नियोजन समितीची बैठक 26 जानेवारीला दुपारी 2 वाजता सातरस्ता येथील नियोजन भवनात होणार आहे. 
हेही वाचा - सोलापुरातील बंडखोरांच्या विरोधात राष्ट्रवादीतर्फे ऍड. मराठे 
पालकमंत्री वळसे-पाटील यांचा पहिलाच सोलापूर दौरा आणि सोलापूर दौऱ्यातील पहिलीच बैठक रविवारी (ता. 26) होणार असल्याने जिल्ह्यातील प्रशासकीय यंत्रणा कामाला लागली आहे. सोलापूरचे जिल्हाधिकारी डॉ. राजेंद्र भोसले यांची बदली महावितरणमध्ये कल्याण येथे झाली आहे. त्यांच्या जागेवर मिलिंद शंभरकर यांची नियुक्ती झाली असून त्यांची आज पदभारही स्वीकारला आहे. जिल्हा परिषदेच्या अध्यक्षपदी अनिरुद्ध कांबळे व महापौरपदी श्रीकांचना यन्नम यांची निवड झाल्यानंतर जिल्हा नियोजन समितीची पहिलीच बैठक होत आहे. या बैठकीत पालकमंत्री, जिल्हाधिकारी, आमदार, जिल्हा परिषद अध्यक्ष व महापौर हे नवीन चेहरे या बैठकीत पहिल्यांदाच सहभागी होणार आहेत.