तासगाव : नवी डोर्ली फाटा, बलगवडे (ता. तासगाव) येथे बुधवारी (ता. २५) रात्री दहा वाजण्याच्या सुमारास माजी सैनिक (Ex Soldier) गणपती धोंडिराम शिंदे (वय ६५) यांचा राहत्या घरात डोक्यात लोखंडी रॉड घालून खून केल्याची घटना काल सकाळी उघडकीस आली. दरम्यान, याप्रकरणी पोलिसांनी एका संशयितास ताब्यात घेतले आहे. खुनाच्या घटनेने परिसरात खळबळ उडाली आहे.

याबाबत घटनास्थळ आणि पोलिसांकडून (Tasgaon Police) मिळालेली माहिती अशी की, गणपती शिंदे हे भारतीय सैन्य दलातून सुभेदार पदावरून निवृत्त झाले आहेत. त्यांची दोन्ही मुले नोकरीनिमित्त बाहेरगावी रहातात. त्यामुळे सध्‍या नवी डोरली फाटा, बलगवडे येथील स्वतःच्या घरात एकटेच राहत होते. काल सकाळी त्यांचा खून झाल्याचे झाल्याचे उघड झाले.

हल्लेखोरांनी त्यांना मारल्यानंतर लोखंडी रॉड तेथेच टाकून त्यांची चारचाकी गाडी (एमएच १०, डिजी ४१०५) घेऊन पसार झाल्याचे निदर्शनास आले. याप्रकरणी अमित गणपती शिंदे यांनी तासगाव पोलिसांत फिर्याद दिली. या घटनेची माहिती मिळताच पोलिस निरीक्षक सोमनाथ वाघ यांच्यासह पोलिस पथकाने घटनास्थळी धाव घेतली. उपविभागीय पोलिस अधिकारी सचिन थोरबोले यांनीही घटनास्थळी भेट दिली.

गणपतराव शिंदे हे बुधवारी रात्री गावातील एका धाब्यावर जेवायला गेले होते. तेथे त्यांनी एकाबरोबर मद्यप्राशन केले होते. त्या ठिकाणी वादावादी झाली होती. त्या संशयितानेच खून केला असावा, असा अंदाज असून, त्या दिशेने पोलिसांनी तपास सुरू केला आहे. त्या संशयितास पोलिसांनी पळवून नेलेल्या गाडीसह ताब्यातही घेतले आहे. याप्रकरणी त्या संशयिताकडे कसून चौकशी सुरू असून, अधिक तपास तासगाव पोलिस करत आहेत.