सांगली ः सारे जग लॉकडाऊन असताना शेतकरी मात्र शिवारात प्रचंड कष्ट उपसतो आहे. त्याला घरात थांबून चालणार नाही. त्याला द्राक्षाची बाग, ऊस, भाजीपाला जगवलायच पाहिजे.

संकट कितीही आले तरी हातपाय हलवलेच पाहिजेत. या संकटात शेतकऱ्यांनी म्हैसाळ उपसा सिंचन योजना चालवण्यासाठी तब्बल पावणेदोन कोटी रुपयांची पाणीपट्टी जमा केली आहे. पाटबंधारे विभागाच्या कर्मचाऱ्यांनी अतिशय चिकाटीने ही वसुली केली आहे. त्यामुळे 5 मार्चपासून ही योजना अखंडपणे सुरु आहे.

जलसंपदामंत्री जयंत पाटील यांनी लॉकडाऊनच्या काळातही शेतकऱ्यांच्या बांधावर पाणी पोहचलेच पाहिजे, असे स्पष्ट आदेश दिले होते. खासदार संजयकाका पाटील यांनी संपूर्ण योजनेचा दौरा करून पाहणी केली. अधीक्षक अभियंता हनुमंत गुणाले, कार्यकारी अभियंता सूर्यकांत नलवडे आणि त्यांच्या टीमने म्हैसाळ योजनेबाबत सातत्याने सकारात्मक भूमिका घेतली. वसुलीसाठी पाठपुरावा ताकदीने सुरु ठेवला. प्रत्यक्ष शिवारात धावणाऱ्या कर्मचारी आणि त्यांच्या कंत्राटी सहकाऱ्यांनीही मोठे काम उभे केले.

शेतकऱ्यांनी या प्रयत्नाला साथ दिली. परिणामी, या संकटकाळातही म्हैसाळचे पाणी खळाळून वाहते आहे. आतापर्यंत 1 कोटी 77 लाख रुपयांची वसुली झाली आहे. हा आकडा लवकरच सुमारे अडीच कोटींपर्यंत जाईल, अशी अपेक्षा आहे.
यावर्षी कमी पंप सुरु असतानाही योजना गतीने कार्यान्वित राहिली आहे. त्यामागे गेल्या वर्षभरात झालेल्या अस्तरीकरण कामाचा फायदा झाला आहे. सध्या टप्पा क्रमांक एकसाठी 16 पंप, टप्पा दोनसाठी 20 पंप, टप्पा तीनसाठी 11 पंप, टप्पा चारसाठी 12 पंप, टप्पा पाचसाठी 6 पंप, टप्पा 6 अ ला तीन पंप, डोंगरवाडी योजनेसाठी 3 पंप, गव्हाण योजनेवर 3 पंप तर आगळगाव जाखापूर योजनेवर एक पंप सुरु आहे.

मिरज तालुक्‍यासाठी 740 दशलक्ष घनफूट पाणी उचलण्यात आले आहे. या तालुक्‍यातून 87 लाखांची वसुली झाली आहे. कवठेमहांकाळ तालुक्‍यात 468 दशलक्ष घनफूट पाणी उपसले असून 31 लाखांची वसुली झाली आहे. तासगावसाठी 141 दशलक्ष घनफूट पाणी उपसा झाला असून 21 लाख रुपयांची वसुली झाली आहे. जत तालुक्‍यात 834 दशलक्ष घनफूट पाणी उपसण्यात आले असून 36 लाखांची वसुली करण्यात आली आहे.