संगमनेर (नगर ) ः ती अत्यंत बोलकी, चटपटीत. दुचाकीवरून खड्ड्यात पडल्याचे निमित्त झाले. पडताना दुचाकीच्या हॅंडलचा पोटाला मार लागल्याने यकृताला जखम झाली. शस्त्रक्रिया झाली; पण तिला वाचविण्याचे मानवी प्रयत्न तोकडे पडले. डॉक्‍टर होऊन समाजसेवा करण्याचे तिचे स्वप्न नियतीने हिरावून घेतले. एक डाव अर्ध्यावरतीच मोडला. आणखी एक कहाणी अधुरीच राहिली..! 

ऋतुजा मच्छिंद्र आरोटे (वय 18, रा. देवकौठे) असे या अभागी तरुणीचे नाव. वडील प्राथमिक शिक्षक. ऋतुजा लहानपणापासूनच हुशार. सतत बोलकी. मोठेपणी डॉक्‍टरच होणार, असा तिचा निर्धार होता. देवकौठे येथील जिल्हा परिषद प्राथमिक व माध्यमिक विद्यालयात तिचे शिक्षण झाले. दहावीत तळेगाव केंद्रात ती पहिली आली होती. सह्याद्री महाविद्यालयात बारावी सायन्स शाखेतून 93 टक्के गुण मिळवून तिने पहिला क्रमांक मिळण्याची परंपरा कायम ठेवली. वैद्यकीय शिक्षणासाठीची पात्रता परीक्षाही ती उत्तीर्ण झाली. "बीएएमएस'साठी तिला प्रवेश मिळत होता; पण तिचे स्वप्न मोठे होते. "एमबीबीएस' होण्याच्या जिद्दीने "गॅप' घेऊन ती पुन्हा लोणी (ता. राहाता) येथे प्रवेश परीक्षेच्या तयारीला लागली. 

हेही वाचा ःडाॅक्टरकडे मागितली दहा लाखांची खंडणी

दुसरीकडे नियतीच्या मनात काही वेगळंच सुरू होतं. अकरावीत शिकणाऱ्या लहान भावाला चिंचोली गुरव येथून आणण्यासाठी रविवारी (ता. 8) सायंकाळी ती दुचाकीवर गेली. भावासह घरी येताना देवकौठे ते चिंचोली गुरव रस्त्यावरील खाडे पोल्ट्री फॉर्मजवळ समोरून येणाऱ्या ट्रकला तिने साइड दिली; मात्र त्याच वेळी तोल सुटल्याने दोघेही बहीण-भाऊ रस्त्याच्या कडेला असलेल्या 10 फूट खोल खड्ड्यात दुचाकीसह कोसळले. त्यानंतरही दुचाकी खड्ड्यातून बाहेर काढून ती चालवीत पुन्हा घरी आली. 

खड्ड्यात कोसळताना दुचाकीचा हॅंडल तिच्या पोटाला लागला होता. त्यामुळे यकृताला जखम झाली. प्रचंड वेदना ती सहन करीत होती. वडील मच्छिंद्र आरोटे यांनी तिला उपचारासाठी प्रथम वावी येथे, तेथून सिन्नर व नंतर नाशिकला हलविले. रविवारी रात्रीच तिच्या यकृतावर शस्त्रक्रिया करण्यात आली. मात्र, रक्तदाब खालावल्याने प्रकृती चिंताजनक होत गेली. अखेर काल (मंगळवारी) सकाळी सात वाजता मृत्यूशी चाललेली तिची झुंज संपली. एक उमलतं स्वप्न विरून गेलं. नियती जिंकली..!