सांगली-युवा नेते, कृषी व सहकार राज्यमंत्री डॉ. विश्‍वजीत कदम यांच्यावतीने संचारबंदी काळात गरीबांसाठी मोफत जेवण पार्सल वितरणास आज प्रारंभ झाला. विद्यार्थी कॉंग्रेसतर्फे आज पहिल्या दिवशी पाचशे लोकांना घरपोहोच जेवण देण्यात आले. "लॉक डाऊन' संपेपर्यंत गरीबांना जेवण पुरवले जाईल असे विद्यार्थी कॉंग्रेसचे जिल्हाध्यक्ष सौरभ पाटील यांनी सांगितले. 

राज्यमंत्री डॉ. कदम यांनी "लॉक डाऊन' काळात सांगलीतील गरीब, बेघर आणि परप्रांतिय कामगार, परगावचे विद्यार्थी यांना मोफत घरपोहोच जेवण देण्याचा निर्णय घेतला आहे. विद्यार्थी कॉंग्रेसच्या सदस्यांमार्फत हे जेवण पुरवले जाणार आहे. तसेच संचारबंदी काळात लोकांच्या अडचणी सोडवण्यासाठी विद्यार्थी कॉंग्रेसने हेल्पलाईन सुरू केली आहे. जेवण वाटपाच्या उपक्रमास आज प्रारंभ झाला. 

जिल्हाध्यक्ष पाटील म्हणाले, ""संपूर्ण जगात "कोरोना' ने हाहाकार माजला आहे. देशात रुग्ण आहेत. महाराष्ट्रात देखील "कोरोना' बाधित रूग्णांची संख्या दोनशे पार झाली आहे. जिल्ह्यात देखील 25 कोरोना बाधित रूग्ण आहेत. "कोरोनो'चा उद्रेक वाढत असल्याने देशात "लॉक डाऊन' केला आहे. त्यामुळे शहरात असलेले परप्रांतीय कामगार, विद्यार्थी, गरीब लोक यांची जेवणाची गैरसोय होत आहे. त्यामुळे राज्यमंत्री डॉ. विश्वजीत कदम यांना जेवणाची सोय करण्याचे आदेश दिले आहे. त्यानुसार सांगलीत आज पहिल्या दिवशी 500 लोकांना जेवण घरपोच करण्यात आले. 14 एप्रिलपर्यंत हा उपक्रम राहील.'' 
दरम्यान जिल्हाध्यक्ष सौरभ पाटील, विश्वजीत युथ फाऊंडेशनचे उदय शिंदे, शहर अध्यक्ष सौरभ साळुंखे, उपाध्यक्ष ओंकार पाटील आदींनी या उपक्रमाचे संयोजन केले आहे.