गोकाक (बेळगाव) : वारंवार नादुरुस्त होणारा ट्रान्स्फॉर्मर (टीसी) बदलून त्या ठिकाणी नवीन टीसी बसविण्यासाठी ६५ हजारांची लाच स्वीकारणारे हेस्कॉमचे दोघे अधिकारी एसीबीच्या जाळ्यात अडकले. लोळसूर (ता. मुडलगी) येथील हेस्कॉमच्या विभागीय कार्यालयात शुक्रवारी (ता.२९) एसीबीने ही कारवाई केली. लोळसूरचे सेक्‍शन ऑफिसर प्रकाश विरुपाक्षी परीट आणि अधिकारी मल्लय्या कुमारस्वामी हिरेमठ अशी त्यांची नावे आहेत.

वरील संशयिताविरोधात शुक्रवारी (ता.२९) आनंद उद्दप्पा धर्मट्टी (रा. अरभावी ता. मुडलगी) यांनी एसीबी पोलिसात फिर्याद दाखल केली होती. फिर्यादी आनंद यांच्या वडिलांच्या मालकीची मुडलगी तालुक्‍यातील अरभावी गावात सर्व्हे नंबर ४३/१ मध्ये जमीन आहे. सदर जमिनीमध्ये असलेली टीसी वारंवार नादुरुस्त होत असल्याने ती टीसी बदलून त्याठिकाणी नवीन टीसी बसविण्याची मागणी हेस्कॉमच्या वरील अधिकाऱ्यांकडे केली होती. मात्र, टीसी बदलून देण्यासाठी दोघांनी आनंद यांच्याकडे ६५ हजार रुपयांची मागणी केली होती. त्यामुळे त्यांनी याबाबत एसीबी पोलिसात फिर्याद दाखल केली होती.

हेही वाचा - संबधीत तरुणावर हल्ला नेमका का झाला याचे कारण समजू शकले नाही

पोलिस अधीक्षक बी. एस. न्यामगौडर यांच्या मार्गदर्शनाखाली पोलिस उपअधीक्षक एन. वेणुगोपाल यांच्या नेतृत्वाखाली पोलिस निरीक्षक एच. सुनीलकुमार, ए. एस. गुदीगोप्प व त्यांच्या सहकाऱ्यांनी सापळा रचून लाच स्वीकारताना दोघांनाही रंगेहात अटक केली. संशयितांची जिल्हा रुग्णालयात वैद्यकीय तपासणी करुन न्यायालयासमोर हजर करण्यात आले असता त्यांची रवानगी कारागृहात करण्यात आली.

संपादन - स्नेहल कदम