खानापूर : गणेबैल (ता. खानापूर) येथे उभारण्यात येत असलेल्या टोलनाक्याला भरधाव वेगाने जाणाऱ्या खडीवाहू टिप्परची जोराची धडक बसून अपघात घडला. यात टिप्परची डिझेल टाकी फुटून लागलेल्या आगीत टिप्पर पूर्णतः जळून खाक झाला आहे. सुदैवाने यात कोणतीही जीवित हानी झालेली नाही. मात्र टिप्परचे मोठे नुकसान झाले आहे.

सोमवारी सकाळी ११ च्या सुमारास उत्तमकुमार बापशेट (रा. टिळकवाडी-बेळगाव) यांच्या मालकीचा दहा चाकी टिप्पर खडी घेऊन रमेश तमुचे (रा. माडीगुंजी) हा चालक रामनगर येथे निघाला होता. दरम्यान गणेबैलजवळ उभारण्यात येत असलेल्या टोलनाक्याला त्याची धडक बसली. धडक इतकी जोराची होती की यात डिझेल टाकी फुटून आगीचा भडका उडाला. प्रसंगावधानाने चालकाने टिप्पर मधून बाहेर उडी घेतली. काही क्षणातच संपूर्ण टिप्परने पेट घेतला. अग्निशामक दलाने आग आटोक्यात आणली मात्र यात टिप्परचे मोठे नुकसान झाले. खानापूर पोलिसांनी घटनास्थळी भेट देऊन पंचनामा केला. घटनेची नोंद खानापूर पोलिसात झाली आहे .