कोल्हापूर - मल्टिस्टेट करण्यासाठी दिल्लीत असणारा गोकुळचा ठराव रद्द करणार असल्याचे पत्र देवून सर्वसाधारण सभेतही जाहीर केले आहे. तरीही, कागदोपत्री इतिवृत्त मंजूर करून आणि गोकुळ मल्टिस्टेट करून दाखवावाच, अशा इशारा आमदार सतेज पाटील यांनी आज दिला.

जिल्हा सहकारी दुध उत्पादक संघाची 57 वी वार्षिक सर्वसाधारण सभा झाल्यानंतर आमदार पाटील यांनी अजिंक्‍यतारा येथे पत्रकार परिषद घेतली. त्यामध्ये ते बोलत होते. 

आमदार सतेज पाटील म्हणाले, गोकुळ मल्टिस्टेट होवू नये यासाठी जिल्ह्यातील दूध उत्पादकांनी लढा उभारला. यामध्ये खासदार संजय मंडलिक, आमदार हसन मुश्रीफ, माजी आमदार चंद्रदीप नरके, आमदार विनय कोरे, ज्येष्ठ नेते संपतराव पवार - पाटील, माजी आमदार के. पी. पाटील, ए. वाय. पाटील यांनी यासाठी पुढाकार घेतला.

गोकुळ दुध उत्पादकांना गोकुळ मल्टिस्टेट नको आहे. तरीही, तो रेटून केला जावू नये यासाठी गेल्या वर्षी गोकुळच्या सभेत याला कडाडून विरोध झाला. अजूनही दूध उत्पादक शेतकरी शांत झालेले नाहीत. आजच्या सभेत गेल्यावर्षीचे इतिवृत्त मंजूर केले जाणार होते. यासाठी काल प्रमुख नेते आणि कार्यकर्त्यांची बैठक घेतली.

आमदार पी. एन. पाटील यांनी मोबाईलवरून हसन मुश्रीफ यांच्याशी संपर्क साधून गोकुळ मल्टिस्टेटचा निर्णय रद्द करणार असल्याचे सांगितले होते. आमच्या मागणीनूसार गोकुळचे अध्यक्ष रविंद्र आपटे यांनी दिल्लीत पाठवलेला प्रस्ताव रद्द करणार असल्याचे जाहीर केले आहे. तसा व्हिडिओ आणि पत्रही आमच्याकडे असल्याचे आमदार पाटील यांनी सांगितले. 

आमदार पाटील म्हणाले, इतिवृत्त वाचून मंजूर केले अशी तक्रार येत आहे. मात्र, त्यांनी स्वत: पत्र दिले आहे. याशिवाय, सभेतही गोकुळ रद्द करणार असल्याची घोषणा करूनही त्यांना आमची नव्हे, तर दुधउत्पादक शेतकऱ्यांची फसवणूक करून दाखवावीच, मग आम्ही आमचा लढा काय आहे. ते दाखवून देतो, असा इशाराही आमदार पाटील यांनी दिला.