सांगली : ब्रिटिश सत्तेला प्रतिसरकार स्थापन करून आव्हान देणारे क्रांतिसिंह नाना पाटील यांच्या कन्या क्रांतिविरांगणा हौसाक्का भगवानराव पाटील (hausatai patil) (वय ९३) यांचे आज निधन झाले. त्यांच्या रुपाने स्वातंत्र्य लढ्यातील एक धगधगता निखारा आणि जाज्वल्य इतिहासाच्या साक्षीदार हरपल्याची भावना जिल्ह्यात व्यक्त होत आहे. (krantisinh nana patil)

हणमंतवडिये (ता. कडेगाव) येथे त्यांचा निवास होता. चार दिवसांपूर्वी त्यांची प्रकृती खालावल्याने कराड येथील कृष्णा रुग्णालयात त्यांना दाखल करण्यात आले होते. आज उपचारादरम्यान त्यांची प्राणज्योत मालवली. डाव्या चळवळीशी त्या अखेरच्या क्षणापर्यंत जोडून राहिल्या. सामान्य लोकांच्या प्रश्‍नांसाठी त्यांनी लढे दिले. माजी आमदार भाई भगवानराव पाटील यांच्या त्या पत्नी होत. शेतकरी कामगार पक्षाचे नेते ॲड. सुभाष पाटील, प्रा. विलास पाटील यांच्या त्या आई होत.

हौसाक्कांनी आयुष्यभर कष्टकऱ्यांच्या प्रश्‍नासाठी संघर्ष केला. २००२ साली खानापूर तहसिल कार्यालयासमोर १०३ दिवसांच धरणे आंदोलन केले. दुष्काळ प्रश्‍नावर तेथे जनावरे बांधून प्रशासनाला आव्हान दिले. ताकारी व टेंभू योजनेच्या पाणी प्रश्‍नासाठी सातत्याने संघर्ष केला. माजी राष्ट्रपती सौ. प्रतिभाताई पाटील यांच्या हस्ते त्यांचा विशेष सन्मान करण्यात आला होता.