आळसंद : येरळा नदीच्या कार्यक्षेत्रात रविवारी (ता. 6) रात्री वादळी वाऱ्यासह जोरदार पाऊस झाला आहे. येरळा नदीला पूर आले आहे. नदीच्या पाणी पातळीत वाढ झाली आहे. उत्तरा नक्षत्राचा पाऊस चांगला बरसला आहे. यामुळे शेतकरी सुखावला आहे. भाळवणी-शिरगाव, कमळापूर-रामापूर पूल पाण्याखाली गेला आहे. बळीराजा स्मृती धरण पाण्याखाली गेले आहे. तालुक्‍यात सरासरी 62 मिली मीटर पावसाची नोंद झाली आहे. 

रविवार रात्री झालेल्या पावसाने परिसरातील सिमेंट बंधारे, ओढे, नाले भरून वाहत आहेत. विहिरी पाण्याने तुडुंब भरल्या आहेत. ऊसाच्या सरी पाण्याने भरल्या आहेत. वादळी वाऱ्याने ठिकठिकाणी ऊस भुईसपाट झाला आहे.

यामुळे ऊस उत्पादक शेतकऱ्यांचे मोठ्या प्रमाणात नुकसान झाले आहे. कमळापूर-रामापूर या गावांना जोडणारा कमळापूरचा पूल पाण्याखाली गेला आहे. भाळवणी-शिरगाव पूलाही पाण्याखाली गेला आहे. दोन्ही गावांचा संपर्क तुटला आहे. येरळा दुथडी भरून वाहू लागली आहे. 

'रविवारी रात्री झालेल्या पावसाने येरळानदीला पाणी वाढले आहे. परिसरातील शेतीला त्याचा फायदा होईल . " 
- सुरेश चव्हाण, शेतकरी, बलवडी ( भा.) 

मंडलनिहाय झालेला पाऊस : 
मंडलची नावे पडलेला पाऊस (मिलीमीटर मध्ये) 
विटा : 62 
भाळवणी : 58 
लेंगरे : 51 
खानापूर : 58 
कंरजे : 81 

संपादन : प्रफुल्ल सुतार

सांगली

सांगली