चिक्कोडी : कर्नाटक-महाराष्ट्राचे लक्ष लागून राहिलेल्या आलमट्टी (Almatti Dam) जलाशयातून शुक्रवारी संध्याकाळी सहा वाजता ३ लाख क्युसेक विसर्ग करण्यात येत आहे. सध्या जलाशयात दोन लाख दहा हजार क्युसेक पाणी वाहून येत आहे.

महाराष्ट्रातील जलाशयांतून येणारे पाणी व पावसाच्या पाण्याची आवक प्रचंड वाढत आहे. सध्या कृष्णेत पाणी वाढत आहे. त्यामुळे आणखी पाणी कृष्णेतून (Krishna River) आलमट्टीत वाढणार आहे. त्यासाठी महाराष्ट्रातून विनंती आणि पाण्याची आवक पाहून आलमट्टीतून विसर्ग वाढविण्यात आला आहे.

गुरुवारी (ता. २५) दुपारी पावणे तीन लाख क्युसेक पाण्याचा विसर्ग करण्यात आला होता. प्रत्यक्षात कालच तीन लाख विसर्ग करण्याचे नियोजन होते; पण रात्री उशिरापर्यंत आदेश प्राप्त झाला नसल्याने शुक्रवारी (ता. २६) दुपारी दोन लाख ९० हजार व संध्याकाळी सहा वाजता आणखी दहा हजार वाढवून एकूण तीन लाख क्युसेक विसर्ग सुरू करण्यात आला आहे.

महाराष्ट्रातील धरण क्षेत्रात दमदार पाऊस पडत आहे. याबरोबर चिक्कोडी विभाग व कोल्हापूर आणि सांगलीतही अधिक पाऊस असल्याने हे पाणी विविध नद्यांतून कृष्णेत मिसळत आहे. त्यामुळे कृष्णेचा पूर टाळण्यासाठी आलमट्टीतून विसर्ग वाढविण्यात येत आहे. शुक्रवारी कृष्णा नदीतून आलमट्टीत जाणाऱ्या पाण्यातही वाढ झाली आहे. सध्या धरणात ८०.६० टीएमसी पाणीसाठा (६५.४९ टक्के) झाला आहे.

विसर्ग वाढविण्यात आल्याने रोज धरणातील साठा कमी होत आहे. आठवड्यापूर्वी शंभर टीएमसी भरलेले धरण आता ८० टीएमसीवर आले आहे. आतापर्यंतचा हा सर्वाधिक विसर्ग असल्याचे सांगण्यात आले. आलमट्टीतून विसर्ग वाढवून कर्नाटक व महाराष्ट्र या दोन्ही राज्यांकडून पूरस्थिती नियंत्रणात आणण्याचे प्रशासनाचे प्रयत्न सुरू आहेत.